Jop ka Laru SC bad Myngkrem haka Pre Quarter Final jong ka 2nd Division (TSA)
Mynta ka sngi 23 tarik yn sdang ka 1st Division.
Jowai, Nailur 22: Ka jingïakhun Pre Quarter Final haka kyrdan ‘Joybell Suiam Memorial 2nd Division Football League bala pynïaid da ka Thadlaskeiñ Sports Association (TSA) West Jaiñtia Hills kaba la long mynta ka sngi 22 tarik u Nailur ha madan Wahiajer Multi-Sports Complex.
Haba phai sha ka jingïakhun Pre Quarter Final ba nyngkong ka Laru SC kala pynliem da 1-0 kol ïa ka Myntoilang Bamkamar, ïa katei ka shikol na ka Laru SC la thep da u Ramario Warlarpih.
Ha ka jingïakhun ba ar ka Myngkrem kala pynliem da 3-2 kol ïaka Namdong-A lyngba ka jingïashut Tie breaker, ka jingïakhuh hapdeng kine ki ar kynhun haduh ka kut jong ka por bala buh kila ïakhaid da mar shikol (1-1). Ïa ka kol naka Myngkrem la thep da u Da o Khynriam haka minit ba 66. Katba ïaka shikol na ka Namdong-A la thep da u Wanpor Myria haka minit ba 37.
La pyntip ba ka Thadlaskeiñ Sports Association mynta ka sngi 23 tarik kan sdang ïaka lympung jong ka 1st Division haka por 1 baje nohphai sngi ha kaba ka kynhun Jalapang SC kan ïakhun pyrshah ïaka Evergreen SC.