SHILLONG, Nailur 18: Ka Jongksha SC ka la lah ban pynjemkhnap ïa ka Laitlyngkot SC haduh 6-1 kol ha ka jingïalehkai ka lympung Second Division 2024 ba la pynïaid da ka Shillong Sports Association ha SSA Ground, Polo, ha ka sngi Balang (18.09.2024). Ha jingïakhun kaba bud pat, la sakhi ïa ka Nongkrem kaba la pynliem ïa ka Lumshyiap da 2-1 kol.
Haba phai sha ka jingïakhun kaba nyngkong ka Jongksha SC ka la ïohlad ban pynkhihjar tang mar ïa sdang ha ka minit ba hynriew lyngba u Robert Khongjoh, nangta u Basuklang Bina (21 min) bad u Wanlambor Kharumnuid (45+2 min) ki la pynbud ïa ki kol ba ar bad ba lai kaba la pynlong ïa ka Jongksha ban lamkhmat haduh 3 kol ha kaba kut jong ka kylla step.
Ha ka kylla miet, u Skhemborlang Majaw (47 min) u la ïoh ban pynphai shi kol na bynta ka Laitlyngkot, hynrei ka Jongksha ka la pynskhem ïalade ban pynthikna ïa ka namjop da kaba thep biang sa lai kol ha ka kylla miet. Kine la thep da u Iohbor Nanglyer (56min), Robert Khongjoh (65min), Frangky Nongspung (87 min).
Ha ka jingïakhun kaba ar, dei ka Lumshyiap kaba la ïoh lamkhmat nyngkong lyngba ka kol na u Arki D Kharmalki (11 minit) hynrei u Wilbert D Marbaniang u la pynïakhaid lyngba ka penalty (45+3min) na bynta ka Nongkrem shuwa ba u Bhabokstar Shyrkon un thep ïa ka namtam ha ka minit ba 81.
Ki jingïakhun ha kane ka Sngi Palei (19.09.2024) ha ka SSA 2nd DIVISION 2024, haka por 12 shiteng mynsngi ka Imson SC kan ïakhun pyrshah ïa ka Umphrup SC, nangta ka jingïalehkai kaba bud ha ka por 3 shiteng nohphai sngi kan long hapdeng ka Smit SC pyrshah ïa ka Sohiong SC. Ki jingïalehkai kin long ha SSA Ground, Polo.
