Shillong, Nailur 11 : Ka Jaïaw Pdeng ka la ïoh rah ïa ka song pisa ba 10 hajar tyngka ha ka jingïashut penalty kaba la tip kum ka ‘Ransom Sutnga Penalty Shootout’ ba la pynïaid da ka NPP 1th North Shillong Constituency Mission Unit ha ka sngi Saitjaiñ jong ka taïew ba lah dep. Ka Jaïaw Pdeng ka la ïoh rah ïa ka nam jop da kaba pynliem ïa ka Sporting Spirit.
Ha katei ka sngi u Bah Ransom Sutnga uba dei u kyrtong ka NPP ban ïakhun ïa ka ilekshon MLA 2023 na North Shillong Constituency u la long kum u Kongsan ha ka jingdon lang u Bah Dap War State President ka NPP, bad kiwei kiwei.
Haba ai jingkren ha katei ka sngi u Bah Ransom u la ai khublei ïa ka NPP Jaïaw Unit kiba la pynlong ïa kaba kum kane ka jingïalehkai kaba long shi bynta ban kyntiew ïa ka sap ki samla ïalehkai. U la kyntu ïa ka NPP Mission Unit ba kin dang ïai bteng ban pynlong ïa kiba kum kane ka jingïalehkai bad kiwei kiwei ruh khnang ba kan long ka jingai mynsiem ïa ki samla bad ba kin lait na kiba bun ki jingsniew khamtam na u drok bad kiwei kiwei ki jingdih kiba sniew. U la ai khublei ruh ïa ka kynhun kaba la jop bad ïa baroh kiba la ïashim bynta. Ka Jaïaw Pdeng ka la ïoh khur ïa ka song pisa ba 10,000 tyngka ryngkat ki syrnot bad ka Sporting Spirit ka ïoh 5,000 tyngka. Ha katei ka jingïashut penalty la wan ban ïashim bynta da 32 tylli ki team.
