Jowai, Ïaïong 12: Ka lympung ïalehkai phutbol ba la tip kum ka ‘2nd U Adelbert Laloo Memorial Trophy’ jong ka kyrdan 3rd Division Football Tournament 2022 ba la pynïaid da ka West Jaiñtia District Sports Association (WJDSA) kaba la long mynta ka sngi 12 tarik u Ïaïong ha madan Kiang Nangbah Stadium Jowai.
Ha ka jingïakhun ba nyngkong na ka liang ka kynhun ïalehkai jong ka Iooksi Youth Welfare kala jop da 3-1 kol pyrshah ïa ka Khliehshnong Ialong bad ïa katei ki kol na ka Iooksi YW la theh da u Ngaitmi Syngkon ha ka minit ba 13, Tympang Tangliang minit ba 79 bad u Khadduh Tangliang ha ka minit ba 80+1. Na ka Khliehshnong Ialong ïa ka shikol la thep da u Simlut Dhar ha ka minit ba 57.
Ka jingïakhun ba ar kala long hapdeng ka Shangpung Khliehmuchut pyrshah ïa ka Lumkhangdong Kyndontuber, ha ka jingïakhun ka Shangpung kala jop da 4-0 kol, ïa ki kol na ka la theh da u Sanki Langstang ha ka minit ba 3, u Rangdajied Sayoo ha ka minit ba 10 bad u Bashan Iakai ha ka minit ba 70 bad 80+1.
Katba ha ka jingïakhun kaba lai bala wan ban aireng hapdeng ka Myrjai pyrshah ïa ka Mawsiang FC Nongkhroh, ka Mawsiang FC Nongkhroh ka la jop tang shikol 1-0 bad ïa katei ka shikol la theh da u Rio Marboh ha ka minit ba 59.
Ka jingïakhun lashai ka sngi 13 tarik kan long hapdeng ka Chyrmang Wah pyrshah ïa ka Mukhla Umlangshor ha ka por 11 baje mynstep, ka Mynso Blazon pyrshah ïa ka Mookynphad Mihmyntdu ha ka por 1 baje nohphai sngi bad ka Newhill pyrshah ïa ka Mookaswan Dongwah haka por 3 baje janmiet.
