SOHRA, Rymphang 27: Ka Hurdles CC Mawsynram bad ka Laitkynsew MC ki la jop ïa la ki jong ki jingïalehkai ha ka sngi ba phra (Day 8) jong ka lympung 5th District League T20 Cricket Tournament 2026 ba la pynïaid da ka East Khasi Hills Cricket Association ha Saitsohpen.
Ka Hurdles CC Mawsynram ka la pynliem noh da 52 ron ïa ka Nayabasti Youth Club, katba ka Laitkynsew MC ka la jop da 65 ron ïa ka Thynroit CC.
Ha ka jingïalehkai ba nyngkong ka Hurdles CC ka la buh ïa ka thong kaba 188/9 haki 20 ober, ha kaba u Sandystone Kharshandy u la khyrwit spah ron, da kaba kamai 128 naki 66 bol, katba u Rakesh Boro u la khur 3/38 naki 4 ober.
Haba pyrshang jubab, ka Nayabasti Youth Club ka la pynkut noh tang 136/8 haki 20 ober. U Shrimonto Hajong u la khur 2/26 haki 4 ober, hynrei ïa ka nam Player of the Match la khur da u Sandystone kharshandy.
Ha ka jingïalehkai kaba bud, ka Laitkynsew ka la kamai 161/10 haki 18 ober. U Jesper Malngiang u la kamai 65 ron naki 36 bol, katba u Markynsai Syiemlieh u la khur 3/22 naki 3 ober.
Haba beh ïa ka thong, ka Thynroit CC ka la ïohlad ban kamai tang 97/7 haki 20 ober.
U Larikupar Malngiang u la pynkut ïa ka pali bol da kaba khur 3/11 haki 3 ober, hynrei ïa ka khusnam Player of the Match la khur da u Jesper Malngiang.
