Jop ka HITO ïa ka Shillong Press Club ha ka ïalehkai paralok

0

Shillong, Ïaïong 04: Shi bynta ka jingrakhe ïa ka jingdap shisnem kynthih ka jingmih pyrthei sa kawei ka seng bhalang kaba ïeng ban ïakhun na ka bynta ki mat kiba ktah ïa ka bha ka miat jong ka imlang sahlang bad ïa ka jaid bynriew hi baroh kawei, kata ka seng Hynniewtrep Integrated Territorial Organization (HITO), kane ka seng haka 2 tarik mynta u bnai Ïaïong 2022, ka la ïa ai-reng ha ka jingïakob ïalehkai football bad ka kynhun jong ki nongpathai khubor kiba hapoh ka shatri jong ka Shillong Press Club (SPC).
Ka seng HITO kan rakhe ïa ka jingdap shisnem pura haka 6 tarik mynta u bnai Ïaïong 2022, ha Jaiaw Lumpyllong Community Hall, Shillong bad ha kane ka sngi kan sa pynlong ruh ïa ki programme kiba bun jaid bad ka jingleh burom ïa ki dkhot jong kane ka seng.
Haka jingïakhun football hapdeng ka HITO bad ka SPC ha kane ka sngi ka jingïalehkai Friendly Match ka la long ha madan Nongthymmai Parish ha Nongshiliang, Shillong, ha kaba ka jingïakhun haka kylla step ka la long kaba shongshit bad kaba ïakhaid bha. Ha kane ka jingïakhun la ïoh ban pynkhih nyngkong eh ïa ka jar haka Kyllastep, da u nongpathai khubor na ka Batesi TV, u Samla Basan Lyngdoh Nonglait uba la ïoh ban thep ïa ka kol kaba nyngkong eh ha kane ka jingïakob ha kane ka sngi.
Hadien ka jingshah thep shi goal, ki rang ïalehkai jong ka HITO ruh kila ïaleh tyngeh ban ïoh thep bad tang hadien khyndiat minit jong ka kylla step, ki la ïoh pynphai kylla da ar kol.
Ka jingïakhun haka kyllamiet, ki rang ïalehkai jong ka SPC ruh ki la ïakhun tyngeh ban ïoh pynphai kylla bad tang hadien katto katne por, u dkhot jong ka Batesi TV u Samla Kyrshan Lyngdoh Nonglait ula ïoh ban thep ïa ka kol kaba ar na ka bynta ka SPC bad wanrah ka jingïakhaid.
Ka jingïakhun ka la long kaba shongshit ban ïoh rah ïa ka nam jop, hynrei namar kiba bun ki rang ïalehkai jong ka SPC kim dei kiba da ïoh lad ban kilanmet man la ka sngi ban pynjanai ïalade ha kane ka jingïalehkai, kat nangïaid ki minitïalehkai haka kyllamiet ki la nang duh bor bad dei ha kane ka khep ba ki rangbah ïalehkai jong ka HITO kila ïoh ban thep sa ar kol bad ïoh rah syndon ïa ka nam jop ha kane ka jingïalehkai paralok (Friendly Match). Na ka bynta ka kynhun jong ka HITO, ïa ki lai kol la thep da u Sports Secretary jong ka HITO Thadlaskeiñ Area u Samla Dany Suna, katba Samla Rudolfson Marweiñ dkhot jong ka HITO Mylliem u la ïarap thep shi kol.

Leave A Reply

Your email address will not be published.