Shillong, Rymphang 03: Ka lympung ïalehkai kriket ba la tip da ka 4th District League T20 Cricket Tournament 2024 ba la pynïaid da ka East Khasi Hills Cricket Association [EKHCA], ka la jam mynta sha ka sngi ba ar, bad ki ar tylli ki jingïalehkai hynne ka sngi Nyngkong ki la jam sha kaba kut ha kaba ka Friends United CC bad ka Hurdles Mawsynram ki la long ki nongjop.
Ha ka jingïalehkai ba nyngkong ka la long hapdeng ka Lumpaia Avengers CC pyrshah ïa ka Friends United CC. Ka toss la jop da ka Lumpaia Avengers, bad ka la jied ban bol nyngkong.
Haba shimti ïa ka pali tied ba nyngkong ka Friends United ka la lah ba kan kamai 145 ron haduh kaba kut jong ka 20 ober ba la mang bad hap 5 wiket. U Ernestin Kyntiewdor Swer u la long uba kynsai tam ha ka tied da kaba kamai 71 ron naki 54 bol. U Miquel Obando Nongbri rangkawang bol ka Lumpaia Avengers u la ïoh ban khur 4/11 naki 4 over.
Haba pyrshang beh ka Lumpaia Avengers kam shym la lah satia ban kynjoh ïa ka thong, ha kaba ka la lah ban tied tang 131 ron, hap 7 wiket naki 20 over. U Daryll Donald Nongbri u la kyrshan da kaba kamai 32 ron naki 36 bol.
Ka namtam ka long sha u Ernestin Kyntiewdor Swer, nalor ba u la kamai 71 ron ha ka tied u la lah ruh ban khur 2 wiket naki 4 over kaba la ïarap ïa ka Friends United CC ban jop da 14 ron. Namar ka jinglah jong u ban ïalehkai bha u la khur ruh ïa ka khusnam Player of the Match.
Ka jingïalehkai kaba bud hapdeng ka Laitjem CC bad ka Hurdles Mawsynram, la sakhi ïa ka Laitjem kaba la jied ban tied nyngkong hadien ba jop ïa ka toss, bad ka la lah ba kan kamai 126 ron haduh kaba kut jong ka 20 over da kaba khyllem 9 wiket.
U Poilang Thawmuit u la long u rangtied ba kamai bun ron tam ïa ka kynhun, kata da 28 ron naki 35 bol, katba u Sandy Kharshandi u la long uba seisoh tam napdeng ki rangkawang bol jong ka Mawsynram da kaba khur 3/20 naki 4 over.
Haba jubab ka Hurdles Mawsynram ka la pyndep ïa ka kamram tang ha ka 13.4 over ban kamai 127 ron bad hap tang 2 wiket. U Sandy Kharshandi u la long u namtam ha ka tied da kaba kamai 58 ron naki 28 bol kaba la ïarap ïa ka kynhun ban jop da 8 wiket, bad u la khur ruh ïa ka nam Player of the Match.
