Jop ka Folklore Music Video “Ko Lapalang” bad “Ka Jingshad U Laiphew Doh” ha ka VBS International Film Festival, Mumbai

Shillong, Ïaiong 01 : Ki 2 tylli ki jingrwai Folklore jong i Dr. Hamar Babiang Kharlukhi kiba la ai kyrteng “Ko Lapalang” bad “Ka jingshad U Laiphew Doh” ki la jop ïa ki khusnam bapher bapher ha ka Venus Brightest Star International Film Festival 2026 kaba la long ha nongbah Mumbai.
Lah ban kdew ba ka Folklore Music Video “Ko Lapalang” ka la jop ïa ka khusnam Best Music Video, ka Best Lead Actress ba la jop da ka Nakiwandakmen Warjri bad Best Director ba la jop da u Bah El Dhar bad Bah Elmer R. War.
Katba ka Animated Folklore Music Video “Ka Jingshad U Laiphew Doh” ka la jop ïa ka Best Animation Short Film, Best Writer ba la ïoh da i Dr. Hamar Babiang Kharlukhi bad Best Animator ba la ïoh da u Jaksram K. Marak.
Lah ban kdew ruh ba ki don kumba 100 tylli ki phlim na ka Ri lem bad kiba na bar ri ruh kiba lah shah jied ban ïadon bynta lang ha kane Film Festival kaba long ruh ka rynsan ban kyntiew ïa ki kam jong ki nongshna phlim bapher bapher.