Jop ka East Garo Hills CA, pynthut u slap ïa ka jingïakhun hapdeng ka Ri-Bhoi DCA & EKH-DCA

Shillong, Nailur 12: Ki hynriew wicket ba la khur da ka Senggamchi N Sangma ka la ïarap ïa ka East Garo Hills District Cricket Association ban khylliap ïa ka jingïakhun ba khadduh na ka Group Stage da ka namjop ha ka lympung Meghalaya Cricket Association’s U-19 Girls Inter District Cricket Tournament hynne ka Sngi Hat Majai pyrshah ïa ka South Garo Hills DCA.
Hynrei na ka bynta kawei ka jingïalehkai, la hap ban pynsangeh noh namar ka jingshah pynthut ha u Slap.
Ka Senggamchi ka la khur haduh 6/10 hapoh 5 over kaba la kyrshan radbah ïa ka EGH ban ïada na ka jingshahrem watla ka thong ka long tang 51 ha ka jingïalehkai jong ka Zone 2 kaba ha Salpara, North Garo Hills.
Na ka liang jong ka SGH ka la bat lypa ïa ka kyrdan ba nyngkong na ka thup jong ka Zone 2 da ki ar tylli ki namjop, katba ka EGH ka la shah rem ha baroh ar sien ki jingïakhun.
Ka kynhun jong ki thei ka EGH ki la jop ïa ka toss bad ki la jied ban tied nyngkong hynrei ki la shah pynhap baroh ki wicket da 51 ron. Ka Kambesa A Sangma ka la ïoh ban kamai bun ron duh na ka bynta ka kynhun da 16 ron.
Ki thei kiba la ïoh ban khur bun wicket na ka bynta ka SGH ki kynthup ïa ka Rikmanchi M Sangma da 4/8 bad ka Marme M Sangma (3/17), kiwei pat kiba la ïoh ban khur wicket na ka bynta ka kynhun ki kynthup ïa ka Dianchidora N Sangma (2/13) bad ka Srijana Chetry (1/4).
Haba beh ïa kane ka ron ba la buh, yn shym la don kawei ka nongtied kiba la lah ban seisoh, namar ka jinglah jong ka Senggamchi ban pynhap wicket i wei hadien i wei. Ki thei ka SGH ki la shem jingeh ban kamai namar ka jingtbit ki thei kawangbol ka EGH, wat hadien ba ïoh kamai haduh 10 tylli ki wide. Baroh ki wicket jong ka South Garo Hills ki la shah pynhap bad kynjoh tang sha ka 41 ron kaba dang duna ïa ka thong ba la buh da ki thei ka EGH-DCA.
Kiwei pat ki thei kiba la ïoh ban khur wikcet na ka bynta ka East Garo Hills ki kynthup ïa ka Kambesa (2/6) bad ka Silkamchi Marak (2/13) .
Haba phai sha kawei pat ka jingïalehkai jong ka Zone 1 na ka Group A, ka Ri-Bhoi DCA ka la jop ïa ka toss bad jied ban bol shuwa, hynrei ki la ïohlad ban pyndep tang haduh 16.3 over shuwa ba kane ka jingïalehkai kan shah pynsangeh namar ba shah pynthut ha u slap. Ha kane ka por, ki thei ka East Khasi Hills CA ki la ïoh ban kamai 54 ron bad shaha pynhap da 3 wicket.
Na ka bynta ka semifinal ba nyngkong, la pynkhreh ban pynïakhun lashai ka sngi hapdeng ka Ri-Bhoi bad ka South Garo Hills. Ka Shillong Cricket Association (toppers na ka Zone 1’s Group B) bad ka Tura DCA (runners-up jong ka Zone 2) la Sngi Thohdieng.