Amlarem, Naiwieng 27: Ka jingïalehkai phutbol jong ka kyrdan Super Division jong ka Amlarem Football League 2025–26, bala pynïaid da ka Amlarem Sub-Divisional Sports Association, kaba la long hynne ka sngi ha madan Jaraiñ kala long kaba itynnad bha ha kaba ka Amlarem Social Club kala jop da 2-1 kol ïaka YC Pdengkarong.
Haba phai sha ka jingïakhun jong ka kylla step ka YC Pdengkarong kala ïoh ban thep nyngkong lyngba ka penalty ba la shut da u Khambit Langhshiang (2’). Na ka liang ka Amlarem Social Club kala ïakhun tyngeh bad pynïakhaid lyngba u Chantremiki Surong (20’).
Haba wan ban bteng biang ïa ka jingïakhuh jong ka kylla miet ka Amlarem Social Club kala ïoh ban thep ïaka kol kaba ar lyngba u Wankibha Pohtmi (42’)ban khur ïa ka jingjop.
Ka jingïakhun Super Division ha ryngkat ka First Division bad ka Second Division jong ka Amlarem Football League 2025–26 ki dang ïaid shakhmat mynta hapdeng ka jingïaknieh points jong ki kynhun katei ka thaiñ.
