Shah dawa pisa kawei ka samla ha uba tuh mobile na Ïewduh
Shillong, Naitung 07: Uwei u nongshong shnong ka nongbah Shillong u la phah ka jingujor ba ha ka 2 tarik mynta u bnai ha ka por kumba 2 baje nohphai sngi ki runar bym lah ban ithuh ki la tuh ïa ka mobile phone jong u ha Ïewduh, Shillong. Kham hadien haba utei uba ujor u la phone sha ka mobile jong u, uwei u runar bym lah ban tip u la kren ha ka phone bad u la byrngem ïa ka khun jong u bad u la dawa ruh ka pisa T. 10,000/-.
Phet krad uba shim ram pisa na UCO bank
Shillong, Naitung 07: U Branch Head bad Manager jong ka UCO Bank, Jowai (WJH) u la phah ka jingujor ba ha ka 27 tarik u bnai Jylliew uwei uba kyrteng u Ram Chandra Sah, u la shim ram ka pisa T. 12,59,705/- napoh ka Bank bad u la phet krad sha la ka shnong jong u kaba ha jylla Bihar.
Rong ei ki runar shibun ki tiar napoh kawei ka godown
Shillong, Naitung 07: U Sayed Hussain da ka ktien u la pyntip ha Hallidayganj PS (WGH) ba ha ka miet jong ka 2 tarik mynta u bnai, ki runar bym lah ban ithuh ki la prong hapoh ka dukan jong u kaba ha Panbari, Bollongre (WGH) bad ki la tuh ki tiar ba don ha kamra sum, ki tiles, kiwei ki tiar napoh ka godown kaba don hapoh ka dukan.
Jah ka pisa T. 7 lak tam ba dei jong ka tnat Post
Shillong, Naitung 07: Ka Oinam Nishita ka la phah ka jingujor ba ha ka 3 tarik mynta u bnai ka la don ka jingpyntip ba ha ka por ba pynlong ïa ka jingpynshisha kaba hapoh bad ha ka jingtohkit kaba sdang, T. 7,45,180/- kaba dei jong ka tnat Post, kaba dang don hapdeng ka jingtohkit jong uwei uba kyrteng u Koppula Bhanu Prakash, GDS, Branch Postmaster (BPM) ha Kynrut Incl. Laitbyrsu Branch Post Office (EWKH) la shem ba ka la jah bad la suba ba la dep ban pyndonkam bakla da u Koppula Bhanu Prakash.
Shah shoh uwei u briew ha ki runar ha Bamundanga
Shillong, Naitung 07: Ha ka janmiet jong ka 2 tarik mynta u bnai, ki runar bym lah ban ithuh ki la shoh ïa uwei u briew uba la tip kyrteng u Sreechoran Rabha hapoh ka ïingsah jong u hapoh ka shnong Bamundanga kaba dang hab hapoh ka Bhogularbhita OP (WGH). Haba ïadei bad kane ka jingjia, na ka liang ki pulit ki la bat noh ïa 4 ngut ki briew.
Shah bat u rangbah 60 snem ka rta ba thmu tuh battery kali
Shillong, Naitung 07: Dr. SW Momin la phah ka jingujor ba ha ka 3 tarik mynta u bnai ha ka por kumba 3.15 baje mynstep, ki nongshong shnong ka Mission Compound, Tura (WGH) ki la ïohbat markhmat ïa uwei uba kyrteng u Dhiru M Sangma ba la 60 snem ka rta katba u dang thmu ban tuh ïa u battery napoh kawei ka kali kaba don u nombar ML-01A-0060.
Tuh ki runar artylli ki thuk thuk na ki ar jaka
Shillong, Naitung 07: U Md. Moinuddin u la phah ka jingujor ba ha ka miet jong ka 2 tarik mynta u bnai, ki runar bym lah ban ithuh ki la tuh ïa ka thuk thuk jong u kaba don u nombar ML-05M-4843 napoh Mathura compound, Jhalupara, Shillong.
Ha kawei pat ka jingjia, u Jensing Ch Marak u la phah ka jingujor ba ha ka 2 tarik mynta u bnai hapdeng ka por 10.15 baje mynstep bad 2 baje nohphaisngi, ki runar bym lah ban ithuh ki la tuh ïa ka thuk thuk jong u kaba don u nombar ML-08F-0813 napoh compound Tura Civil Hospital (WGH).