Jingdap 75 snem ka Ri India: Da ki Bike yn ñiah ki shipai BSF na Shillong sha Delhi

Shillong, Nailar, 31: Ban rakhe ïa ka jingdap 75 snem jong ka Ri India ki shipai BSF Shillong kin pynlong ïa ka jingïaid paidbah ki Bike kiba 30 tylli na Shillong sha nongbah Delhi ïa kane yn sa khaweh lama ha ka 1 tarik Nailur 2022 na Mawpat.
Haba kren ha ki lat pathai khubor u Inspector General ki shipai BSF ba dei peit ïa ka Shillong Frontier la ong ba ha kane ka jingïaid lynti kin ïa kynduh ïa ki samla pule ha Nongbah jong ka Ri Bhoi District ha kaba kin sa ïa kren bad ki khynnah skul katei ka District.
Kane ka jingïaid kine ki 30 tylli ki bike na Shillong sha Delhi lyngba ka sor bah Kolkatta kane kan long hapoh ka jingpeit jong u Director Genenral ki shipai BSF na Delhi, ha kane ka jingïaid lynti kin sangeh ha ki jaka jaka ban ïa kren bad ki khynnah skul jong ki jylla kaba ki ïaid lyngba.
Kane ka jingpynïaid paidbah ïa ki Bike ka long shibynta ban khring ïa ki khunsam la jong ka Ri India ba kin rung sha kane ka kam shipai ïa da khappud, na kine ki 30 tylli ki bike 15 tylli kidei na ka kynhun Jaanbaaz Motor Cycle Team bad 15 tylli na Seema Bhawani Motor Cycle Team.
Kine ki bike kin ïaid lyngba ka Guwahati, Dhubri, Siliguri, Balurghat, Berhampore, Kolkatta, Dhanbad, Aurangabad Prayagraj, Kanpur, Agra ha jylla Assam, West Bengal, Jharkhand, Uttar Pradesh ban poi Delhi. Ïa kane ka jingïaid ym peit da ka kaophis jong u HQ Special Director General (EC) BSF, Kolkata ryngkat ki bor pulit.