Nongpoh, Naitung 21: U Bah Mayral Born Syiem MLA ka Nongpoh mynta ka sngi u la pynbna ïaka shnong Umkon ha Nongpoh Constituency kum kawei naki shnong ka ban ioh ki lad jingïarap bad ki jingpynmang kyrpang napdeng 129 tylli ki shnong ha baroh kawei ka Nongpoh Constiteuncy.
Haba kren ha katei ka sngi u Bah Mayral Born Syiem u la pyntip ba kum u MLA un jied 5 tylli ki shnong ha baroh kawei ka Constituency ban ioh ïa katei ka jingïarap ba kyrpang bad ka shnong Umkon ka dei kawei naki shnong kaba donbok kaba u phaikhmat ban theh ki kam pynroi ha ki liang bapher bapher.
U la ong ruh ba ki 129 tylli ki shnong kin ioh ïaki jingïarap, hynrei ki 5 tylli ki shnong ha Nongpoh Constituency kin dei kiba donbok ban ioh ki kam pynroi bad ki jingïarap ba kyrpang halor ki jingdonkam jong ki ha kaba ïadei bad ki kam pynroi napdeng kiwei kiwei ki shnong bad ïa kane u la pynthikna ruh hakhmat ki nongïalam shnong ka shnong Umkon, ryngkat ki jingkular kiba un sa pyndep ha katei ka shnong.
Naka liang u MLA hakajuh ka sngi u la leit ruh ban ai jingïarap kumba 5 lakh ïaka Fatima UP School, Umkon ban pynkha ïaki kamra klas lyngba ka skhim SRWP, kaba dei ruh kawei naki skul kaba la kiew sted ha katei ka thaiñ bad kaba don ruh shibun ki khynnah kiba pule bad kaba donkam shisha ka lad jingïarap.
Kum u MLA u la kyrpad ruh ïaki nongïalam shnong ba kin dang ai ka jingïatreilang naka bynta ban pyndep ïaka jingangnud bad ki kam pynroi kiban sa wanrah ha katei ka shnong.
