Shillong, Nailur 21 : Ka Congress ha Meghalaya ka la bthah ïa baroh ki Block Congress Committee ba kin pynkhreh noh ïa ka thup kyrteng jong ki kyrtong kiba kwah ban aireng ha kane ka elekshon MDC kaba lah ban long noh shen ha KHADC bad JHADC.
Haba kren bad ki lad pathai khubor dang shen, u President ka Meghalaya Pradesh Congress Committee (MPCC), Bah Vincent H Pala u la ong, “Ngi la pynkhreh na bynta ka elekshon bad ngi la bthah ruh ïa baroh ki Block ba kin phah noh ïa ka thup kyrteng bad lada ki la don lypa ha jingmut ïa kino kino ki kyrtong ba kin ai shangi.”
U President u la ïathuh ba kumba ju long mynshwa, ki kyrtong ki ju wan ban kynduh ïa u President bad hadien kane u President un sa phah sha ki Block bad ïa ka tiket pat sa rai da ki bor ba kham halor jong ka party. “Hynrei mynta pat ngi la rai ba ïa ka jingai tiket ïa ki kyrtong dei ban rai da ka Block bad ngin ym tuklar satia,” u la ong.
Shuh shuh u ong ruh ba lait noh tang ha kito ki block bad ki district ba kim lah ban rai ba ka MPCC kan hap ban tuklar.
Ha kajuh ka por u Bah Pala u la ong ba shipor bun ki la kren ba ka jingmih noh jong ki lai ngut ki MLA ka Congress na ka party kan ktah bha. Tangba, u ong mynta pat ki la don bun bha kiba wan ban pynïasoh thymmai.
Katkum ka jingong jong u, na ki lai tylli ki constituency ba ka party ka la duh noh ïa ki MLA, ar tylli ki la dep ban pynthymmai bad pynkhie im biang. Kine ki kynthup ïa ka Nongstoin bad ka Umsning katba ïa ka Mawhati pat u la ong ba hangtei ruh shen kin sa pynstet.
Nalorkata u la ïathuh ba bun ngut bha ki MLA barim bad ki Myntri Sorkar ba rim kiba la phah ktien ba ki kwah ban wanphai biang sha ka party. “Ha ka 11 – 12tarik u Risaw kin sa don ki nongïalam ba rangbah kiba kwah ban pynïasoh sha ka party bad nangne kan sa bteng shakhmat,” bynrap biang u Bah Pala.
Lah ban kdew hangne ba ka Congress kaba don saw ngut ki MLA ha Iing Dorbar Thawaiñ ka Jylla hynrei lai ngut ki leit ban pynïasoh noh sha ka NPP bad mynta sah sa tang u MLA ka Mylliem, Bah Ronnie V Lyngdoh.
