Jied lem ban shna thymmai ïa ki skul napoh Rongara-Siju, kyntu u Rakkam ïa u Bernard

Shillong, Jylliew 25: U Myntri ka tnat Pule Puthi ka sorkar jylla u Rakkam A Sangma ha ka sngi baar u la kyntu ïa u MDC ka BJP na Tura Bernard N Marak ban jied ïa katto katne tylli ki skul ha Rongara-Siju constituency na ka bynta ban shna thymmai bad ban tei thymmai ïa ki ïing skul ba thymmai.
“Naba u Bernard u la wan ha ka constituency jong nga, ngan long uba kmen tam lada u jied ïa ki katto katne ki skul na ka thaiñ jong nga ban tei ïa ki building ba thymmai bad ban noh synniang naba ki la don da ki spah tylli ki skul kiba don khlem ki jingtei kiba biang,” ong u Sangma.
Ïa kane u la jubab halor ka jingkynnoh u Bernard ba ki don bun ki skul hapoh ka constituency jong u kiba la jot la pra khlem ki jingtei kiba biang.
U Sangma u la ïathuh ba ka sorkar ka la leh bun ki kam maramot bad ka jingshna pynthymmai ïa ki skul ha kine ki 5 snem ba la leit bad kane kan ïai bteng bad ban pyndep ruh ïa ka kam.
“Ha kawei ka liang ngi kyrpad ïa baroh ki 60 ngut ki MLA ban jied ïa ki skul na ka bynta ban shna pynbha ne ban shna ïa ki jingtei kiba thymmai na ka MLA fund jong ki bad nga kyrpad ruh ïa u Bernard, ban pynlut napoh ka MDC fund jong u ban tei ïa ki skul ha West Garo Hills,” ong u Myntri ka tnat Pule Puthi.