Jied ki nonghikai SSA ban shimti noh da ka tnat Pule Puthi, ar bnai ai por ïa ka Sorkar MDA

Shillong, Risaw, 02: Ki nonghikai skul SSA kiba don hapoh ka shatri jong ka Meghalaya SSA School Association (MSSASA) ba la ïalam da u Bah Aristotle C. Rymbai kum u President ki la kyntait ïa ka jingkyntiew tulop hynrei ki la dawa ïa ka Sorkar Meghalaya Democratic Alliance (MDA) ba la ïalam da ka National Peoples Party (NPP) ban pynkynriah noh ïa ki nonghikai skul SSA na ka State Implementation Society (SIS) sha ka tnat Pule Puthi.
Da ki hajar ngut ki nonghikai skul SSA kiba dei ki dkhot jong ka MSSASA ha ka sngi Balang ki la ïakynduh lang ha Students’ Field, Jaïaw, ban shim ïa kane ka rai shwa ba ki nongïalam ka seng kin sa leit ban aiti da ka jingthoh sha ka tnat Pule Puthi jong ka Sorkar Jylla ha kine ki khyndiat sngi ki ban sa wan.
“Ka rai kaba mih nangne kan dei ka rai kaba khatduh ba ma ngi kum ka MSSASA ngin pyntyllun nangne shakhmat,” la ong u Bah Rymbai haba kren ha ka jingïalang.
Ki nonghikai ki la rah kti ban mynjur ïa ka jingtyrwa jong ka seng ban dawa ïa ka Sorkar Jylla ba kan kynthup lang noh ïa ki nonghikai skul SSA ha ka tnat Pule Puthi.
Ha ka jingïakren bad ki lad pathai khubor u Bah Rymbai u la ong, “hadien ka jingïakynduh jong ngi ha ka 10 tarik u bnai baladep ïa u State Project Director (SPD) uba dei ruh u Director jong ka School Education and Literacy u Swapnil Tembe bad ha ka jingïakynduh ïa u Commissioner and Secretary ka tnat Pule Puthi u Vijay Kumar Mantri ha ka 19 tarik u bnai ba ladep ki la pyntip sha ngi ba ka tnat Pule Puthi ka la pynkhreh shaid shaid ka Cabinet Memorandum na ka bynta ban pynkynriah noh ïa ki nonghikai skul SSA na ka State Implementation Society sha ka tnat Pule Puthi.”
Halor ka jingdawa ban kyntiew ïa ka tulop, u Bah Rymbai u la ong “ha ka jingïakynduh ïa kine ki Ophisar ki la ïathuh ba ka Sorkar kan ieh shwa ïa ka jingpynkiew tulop hynrei kan ïaid shakhmat ban pynkhreh ïa ka Cabinet Memorandum ban kynthup noh ïa ngi ki nonghikai skul SSA ha ka tnat Pule Puthi.”
“Ki (ophisar ka tnat Pule Puthi) la ïathuh ïa ngi ba kane ka kam mynta ka la don ha ka lynti kaba khatduh,” u la bynrap.
U la ïathuh ba ka MSSASA ka la pynsngew ïa ki jingdawa naduh u snem 2019 bad bteng biang da ka jingïakhih ha u snem 2022. “Ka jingïakynduh jong ngi bad ka Sorkar ka la long kumba 22 sien kynthih,” la ïathuh u Bah Rymbai.
“Ngi ai por ïa ka Sorkar ar bnai naduh ka ban sdang naduh ka sngi ba ngi leit buh ïa ka dorkhas ba ka Sorkar kan pyndep ïa ka jingpynkhreh da ka tnat Pule Puthi ïa ka C abinet Memorandum bad ban phah sha ka Kynhun Myntri ban ai ïa ka jingmynjur,” u la ong.
“Hapdeng kine ki ar bnai, ngin sa leit ban ïakynduh ïa ki 12 ngut ki Myntri ka Sorkar Jylla kynthup ruh ïa u Myntri Rangbah ka Jylla u Conrad K. Sangma ban pynsngew ïa ka rai kaba ngi la shim mynta ka sngi bad ngin kyrpad ïa ki ba kin wanrah ïa ka polisi ban pynskhem noh ïa ka kam hikai skul jong ngi hashwa ka 31 tarik, Lber, 2026 kumba ka Sorkar India ka ladep ai jingtip sha ki Sorkar Jylla ba kan ai jingkyrshan pisa haduh ka 31 tarik, Lber, 2026,” pyntip u Bah Rymbai.
“Lada ka Sorkar kam lah ban pynurlong ïa ka jingdawa hapoh kine ki ar bnai, ngin sa pynbna da ka jingïakhih ïa kaba ki nongshong shnong ka ri India kim pat ju ïohi ïa kaba ngi la pynkhreh mynta,” la ïathuh shuh shuh u Bah Rymbai.
“Ngi la shim ïa kane ka rai, namarba ha ki snem kiba ladep ngi ladep ban pynlong ïa ki jingïakhih kiba khlem pud sngi bad kiwei kiwei. Ïa mynta ngin ym pat pynbna ïa kane ka sienjam hynrei ngin sa leh pat hadien ba la kut ki ar bnai (ki jingaipor),” ong u Bah Rymbai.
Haba kylli ïa ka jingïaid lynti la kajong da ka All Meghalaya SSA School Teacher’s Association (AMSSASTA) u Bah Rymbai u la ong, “ha kano ka rukom ki leit ïakren bad ka Sorkar ki kham tip bha ma ki kumno ban dawa ïa ka jingkyntiew tulop kaba long shi spah na ka shi spah. Ïa kane ka jingdawa jong ki ngim don eiei ban ong. Hynrei ïa ka jingïaid lynti jong ngi kum ka MSSASA ngi ladep ban pynshai ïa ki para nonghikai haba shit haba shai.”