Shillong, Nailur 24 : Ka komiti jied ïa ki rang ïalehkai kriket jong ka Meghalaya Cricket Association ka la jied ïa 15 ngut ki nongïalehkai bad kumjuh ruh 5 ngut ki nongïalehkai pynap na ka bynta ki lai tylli ki jingïalehkai ba nyngkong jong ka U-23 men’s Col CK Nayudu Trophy 2024-25.
Kane ka lympung kan long ha ka rukom ïalehkai kaba bun sngi bad ka Meghalaya kan ïakhun ïa ka jingïakhun kaba nyngkong pyrshah ïa ka Punjab naduh ka 13 haduh ka 16 tarik u Risaw. Kane ka kynhun kan ïakhun pyrshah ïa ka Andhra Pradesh ha ka 20-23 Risaw bad ïa ka Himachal Pradesh ha ka 27-30tarik u Risaw hadien kata.
Ka Meghalaya ka la kiew na ka kyrdan elite hadien ba ka la wan ba-ar ha ka Plate Group ha ka jingïakhun pyrshah ïa ka Nagaland ha u snem 2023-24. Ka Meghalaya ka la jop lut ïa baroh 6 tylli ki jingïakhun ha ka lynti jong ka ban ïakhun ïa ka nam lahduh hynrei kam shym la lah satia ban pynliem ïa ka Nagaland ha ka phainal.
Mynta ka samoi ki rangïalehkai jong ka Meghalaya kin hap ban ïa kyrshut tyrpeng bad ki nongïalehkai kiba kham tbit bad kumta kan long ruh ka jingïakhun kaban plie lad ïa ki ban ïoh jingtbit namar ki ïoh ban tynjuhbor bad ki kynhun kiba kham khlaiñbor.
Ka Meghalaya ka dang don ha ka jingkilan met mynta ha Bengaluru ha shwa ba kin mih pat nangtei ban leit aireng ha ka ha ka 10 tarik u Risaw.
Ka kynhun ïalehkai jong ka Meghalaya na ka bynta ki lai tylli ki jingïalehkai ba nyngkong ki kynthup ïa u – Kevin S Christopher, Manish Sharma, Aman Kumar, Avinash Rai, Abhishek Kumar, Gulgul Sangma, Gavineal J Marpna, Bipin Kr Ray, Josiah Momin, Joydeepan Deb, Navin Kumar, Purav Agarwal, PM Santhosh, Sachin Kumar, Swastic Chettri.
Katba ki rangïalehkai pynap pat ki kynthup ïa u – Thunun Marak, Kush Agarwal, Rohit Kr Yadav, Bharat Gurung, Raghav Magotra. Nalor kine, ka kynhun jong ki nongpeit pat ka kynthup ïa u – Neetesh Sharma (Head Coach), Synrapsing Riahtam (Assistant Coach), Emidao Dhar (Physio), Skhembor Khongbtep (Trainer), Chuba R Marak (Manager).
