Jied ka MBA ïa 9 ngut ki nongïakura ban ïashim bynta ha ka National Boxing Championships ha Sikkim

Shillong, Jylliew 12 : Ka Meghalaya Boxing Association (MBA) ka la jied haduh 9 ngut ki nongïakura bad 2 ngut ki nongïalam (officials) ki ban mihkhmat ïa ka Jylla sha ka rynsan ïakura kaba la tip kum ka 6th Youth Men National Boxing Championships ka ban long ha Jylla Sikkim naduh 13 tarik haduh 18 tarik mynta u Jylliew 2023.
Ki nongïakura kiba la shah jied ban ïashim bynta ha katei ka championship ki, u Gabriel Kharkongor (48kg), Bawanpher Shadap (51kg),Gareth Garfield Laloo (54kg), Khrawkupar Thangkhiew (57kg), Mewanlambiang Ranee (60kg), Teiboklang Jyrwa (63.5kg), Bahlung Papeng (67kg), Dabit Kharkongor (71kg) bad u Surjeet Dey (75kg),
Ki nongïalam ki long u Bah Dondor Marweiñ kum u Coach bad u Bah Despitol Sun kum u Manager.
Na ka liang u Bah Cornelius Kharhunai kum u President MBA u la ai jingkren shuwa ba katei ka kynhun kan leit sha Sikkim ha kane ka sngi Nyngkong jong ka taïew da ki kyntien sneng ki kyntien kraw bad kyrkhu bad kyrmen ruh na ka liang ki khynnah ba kin ïalehkai bha bad poi sha ka thong jong ka jingjop bad wanrah ruh ka nam ka burom ïa ka ïing ka sem bad kumjuh ïa ka jylla hi baroh kawei.
Kane ka long katkum u kyrwoh khubor na u Bah Dondor Marweiñ, uba dei u Secretary ka Meghalaya Boxing Association (MBA).