Jedicia Sohliya : Ieh ka samla ïa ka kam ha Dubai ban seng kam lajong bad plie lad pat ïa kiwei ki samla

Shillong Nailar 04 : Ha ka por ba ka jingkyrduh kam ka jur bha ha ka jylla bad ha ka ri hi baroh kawei, hynrei bluit la mih kawei ka samla Khasi na ka nongbah da ka mynsiem ïakhun ban ieng ha la ki jong ki kjat da ka thong ban plie lad lem ïa kiwei pat ki para samla kiba mad ïa ka jingeh kumba mad ma ka.
Kane ka samla kadei kaba la tip kyrteng kum ka samla Jedicia Sohliya kaba dei ka nongshong shnong jong ka Pynthorbah. Kane ka samla ka la shim ïa ka rai kaba shlur ban wanphai noh sha la iing hadien ba ka la trei ha Mumbai bad Dubai, ban seng ïa la ka jong ka kam bad ban ïarap ïa ki para samla ban ïoh ïa ki lad ïoh kam ïoh jam.
Haba kren bad ki lad pathai khubor, ka Jedicia ka la ïathuh ba ka dei ka nongseng ïa ka JED Professional Company, ka kompeni kaba pynïasoh ïa ki nongwad kam bad ki kompeni ne ki nongai kam bapher bapher bad ïarap ruh ha kaban ai jinghikai pyntbit kiba harukom kum ha ka jingpyntbit ha ki jait kam, ka Skill Development Entrepreneurship, nalor kiwei ki jait kam kiba dawa bha ha kane ka juk mynta.
Dei ha ka 2tarik Nailar 2025 ka samla Jedicia lyngba ka kompeni jong ka ka la pynlong ïa ka prokram ai jinghikai ïa ki samla wad kam wad jam ha Dorbar Shnong Golf Link, Shillong. Ha kane ka jingïalang la sakhi ïa ka jingïashim bynta jong ki samla na ki thaiñ bapher bapher, kiba la ïoh ïa ka jinghikai bad jingtip ba kongsan ha ka jaka trei bad ki jingtbit ha ka kam seng kam seng jam.
Haba kren sha ki khun samla ka la ong, “Wat shu ap tang ïa ki kam sorkar. Ki lad ki lynti ki don hangne hi ha ka jylla jong ngi lada phi long kiba kloi ban trei shitom bad ban tei ïa la ka jong ka lynti.”
Ka samla Jedicia Sohliya ka la mih kum kawei na ki samla kynthei kaba ai mynsiem ha ka jylla, kaba la pynkylla ïa ka jingshem bad jingtip jong ka na shabar ka thain sha ka kam kaba don jingkyrmen ha la iing. Ka dei ka nongïalam kaba trei da ka jingaiti bad jingthmu ban kyntiew ia ki samla bad ban kyrshan ïa ka jingleit jong ki sha ka jinglah ban shaniah ha lade.
La tip ruh ïa ka kum ka nongseng ïa ka JED Professional Company ,Financial Advisor, Placement Consultant Professional.