Nongpoh, Nohprah 21 : Ka jingbteng jong ka kynhun ki nongñiah thuk thuk bala tip kum ka The Ultimate Legend Bikers Association (TULBA) ban lehbha sha ka imlang ka sahlang khamtam haki aiom khristmas kala pynlong ïa kawei ka longkmie ha ka shnong Umñiangbyrnai Parila ban dap ka mynsiem ryngkat ki ummat jingkmen hadien ba kila iohpdiang syndon da ka iing ba thymmai bad ba paka bala synñiang bad pynshna da ki dkhot ka TULBA.
Ka kynhun TULBA hapoh ka jingïalam u Bah OS Shulai kum u President ba rangbah ryngkat ki dkhot kila leit ban aiti ïa katei ka iing sha ka kong Titi Mery Warjri hynnin ka sngi Saitjaiñ bad ban lehkmen khristmas bad katei ka longiing kaba don hapdeng ka jingeh kaba khraw namar ki sah haka iing kaba la jot rathai.
Ka kong Titi Mery Warjri ka don la lok jong u Bah Shalbinus Lyngdoh Marshillong bad ki don 3 ngut ki khun bad uwei napdeng jong ki u don ruh ka jingduna haka dkhot met bad um lah satia ban kren bad baroh shi katta kane ka longiing ka mad ïaka jingeh kaba khraw bad hap ban shong ban sah ha kawei ka iing ba jot rathai kaba la shu syrdep ban lait tang na u slap bad ka lyer bad ruh ban iohthiah ki khun haka por mynmiet.
Hynrei kumba la phah da u Blei ka Kynhun TULBA kaba ju leh bun ki kam isynei kala ïakynduh ïa katei ka longiing bad ioh ruh ban synñiang katba lah naki dkhot bad mih paidbah ruh ban pynshna syndon da ka iing ba paka ïa kaba la ioh syndon ban aiti hynnin ka sngi Saitjaiñ kum ka jingai sngewbha khristmas ba katei ka longiing kan ioh ban lehkmen lem kumba ioh kiwei.
Ka Kong Titi Mery Warjri kam lah khlem da jaw ki ummat haba iohpdiang ïa katei ka iing kaba kam shym la poi pyrkhat ba kan ioh ban shong ban sah haka iing kaba paka bad kaba itynnad kaba kum ka longiing lyngba ka kmie bad u kpa kila angnud la slem bad pynpaw ruh ka jingsngewnguh shikatdei ïa ka seng TULBA kaba ju kynmaw ban kner ki kti ban leh ïaki kam isynei ryngkat ka jingduwai ba u Blei un dang kyrkhu ïaki ba kin dang lah ban bteng ïaki kam isynei sha ki longiing kiba donkam shisha ka jingïarap.
Haba kren ha kane ka sngi naka liang u Bah OS Shullai President ba rangbah ka TULBA u la ong ba kum ka kynhun baroh kawei ka dap da ka jingkmen hadien ba kila lah ban pyndep ïa katei ka iing kaba kila angnud ban aiti shuwa ka khristmas sha katei ka longiing kaba mad jingeh bad khamtam ba kila ioh ban leh ïaki kam isynei shuwa ban pdiang ïaka jingwan longbriew u Trai Jisu sha kane ka sla pyrthei.
U la ïathuh ruh ba ka jinglah ban pyndep ïa kane ka iing ka dei ka jingsbun mynsiem jong ki dkhot kiba la synñiang katba lah ka bor bad mih ruh da ka bor met ban trei pyndep ïa kane ka iing namar kim dei ki kynhun ba don ba em bad lyngba kane ka jingkynshew bad synñiang da ki dkhot kala pynkmen shikatdei ïaka mynsiem jong katei ka longiing.
Ha katei ka juh ka sngi naka liang ka TULBA kala ioh ruh ban pynlong ïaka jingrakhe khristmas ban sam ruh ïaki jaiñkup syaid sha ki longiing ba duk ha katei ka shnong bala wan ruh ban pynkyntang da u Pastor J Khonglam.
