Jar jar sngap ka HNLC ïa ka jingtyrwa ka sorkar ban wan phai biang sha ka miej jingïakren

Shillong, Jylliew 30 : Hadien ba ka seng Hynniewtrep National Liberation Council (HNLC) ka la rai ban weng noh ïa ade na ka miej jingkren ïasuk bad ka sorkar pdeng-sorkar jylla, na ka liang ka sorkar jylla naduh u Myntri Rangbah u Conrad K Sangma haduh u Symbud Myntri Rangbah uba dei khmih ïa ka tnad kam pohïing u bah Prestone Tynsong ki la ïai tyrwa bad kyrpad ïa ka seng HNLC ban wan phai biang sha ka miej jingkren ïasuk hynrei haduh mynta la ïoh jingtip ba ka seng kam pat ai kano kano ruh ka jubab sha ka sorkar bad ka dang sngap jar jar beit halor kane ka kam.
Dang ha kine ki khyndiat sngi haba la kylli na u Symbud Myntri Rangbah hato ka seng HNLC ka la ai ktien ei ei ne em u la ïathuh ba kat haduh mynta kam pat don kano ka jingai ktien na ka seng HNLC sha ki ksiang kata la ka long lyngba u ksiang ka HNLC ne lyngba u ksiang jongka sorkar ruh.
“ Ym pat don kano kano ka jubab ne jingai ktien na ka liang ka seng HNLC wat hadien ba ngi la ïai tyrwa bad kyrpad ban wan phai biang sha ka miej jingïakren ïasuk” ong u Symbud Myntri Rangbah.
Lah ban pynkynmaw ba kawei na ki kyndon ba ka seng HNLC ka dawa ka long ban map lut ïa baroh ki kam sniew bad kam runar jongki dkhot jongka hynrei na ka liang ka sorkar kam lah ban leh kumta mar mar.
Dang ha kine ki khyndiat sngi hi ruh u Myntri Rangbah u la dep pynpaw ba ïa ki kam sniew barit ba ria lah ban map hynrei kam long kaba suk ban map lut pat ïa baroh ki kam sniew kam runar ba la leh da ki dkhot ka seng wat la ka sorkar jylla ka la ïakren bad ka sorkar pdeng ruh.
“ Ngi la dep ïakren bad ka sorkar India ruh bad ngi la dep pynshai sha ki dkhot ka seng HNLC ruh haduh katno lah ban map ïa kita ki kam sniew kam runar bad ïa kane la pynshai ym tang da ka sorkar jylla hynrei wat ka sorkar pdeng ruh. Namar hap ban bud lang ïa kijuh kyndon haba kren ïasuk kumba leh lang ïa kiwei kiwei ki seng ruh hapoh ka ri haba ka sorkar pdeng ka khot ïakren ïasuk ïa ki. Kumta ngim lah ban ïaid lait ïa kita ki kyndon bad dei halor kane ba ïa ki kam sniew ba rit ba ria lah ban map ne klet noh hynrei kito ki kam beaiñ kiba heh bad khraw kiba ki la leh ha ki por mynshwa ym lah ban map mar mar hynrei hap ban da bishar bniah shwa” ong u Myntri Rangbah.
“Kumta dei halor kane ka nongrim ba nga ong ba ym lah ban ong beit mar mar la map lut ïa ki kam sniew kam runar namar hap ban da bishar sani bha shwa ban shim rai”, ong biang u Myntri Rangbah
“ Ban shu ong beit ba la map lut ïa ki kam sniew kam runar ka long kumba pynkheiñ ne ïaid lait ïa ki kyndon jingkren ïasuk ba la ju leh da ka sorkar pdeng bad ka sorkar jylla ruh” ong u Myntri Rangbah.