Shillong, Jylliew 30 : Ka United Democratic Party (UDP) kaba don haduh 12ngut ki MLA haduh mynta kam pat ïa kren satia la kan don neem ka jingkylliang shuki myntri mar ar snem shiteng kumba ïaid ka jingïakren ha kiwei pat ki party ba don ha ka sorkar Meghalaya Democratic Alliance ba ïalam da ka NPP.
Halor kane haba ïoh ban ïakren bad uwei na ki MLA ka UDP ba bat ruh ïa ka shuki Myntri, Bah Kyrmen Shylla u la ïathuh ba wat ma u ruh um pat ïohsngew ba kan don ka jingïakren ei ei halor kane ka bynta.
“Ngi don haduh 12 ngut ki MLA hynrei ka shuki ka don tang ar tylli. Watla ngi kwah eh ba baroh 12 ngut ban ïoh shong shuki Myntri hynrei kam dei satia kaba lah ban long. Kumta ka rai hi ka shong ha ka party watla haduh mynta ngim pat ïohsngew ba kan don ka jingïakren kaba ïadei bad ka jingkylliang shuki Myntri,” ula ong haba kren bad ki lad pathai khubor.
Related Posts
Ha kajuh ka por u ong ruh ba ha ka UDP kam shym la don satia kano kano ka jingïateh soskular ba hap ban ïa kylliang shuki Myntri mar shi snem ne arsnem shiteng, mar lai snem lane san snem. Tangba u ong pat ba ka rai kaba khatduh hi kadei ha ka party namar ka lah ban rai ba lah ban bthah ban kylliang noh hadien shisnem, ne arsnem shiteng, mar lai snem lane san snem
“Ka party ka lah ban rai ha kano kano ka por bad ka lah ruh ban ym shim rai halor kane ka bynta,” u la bynrap shuh shuh.
Haba jubab halor ka jingkylli, u Bah Kyrmen u la ong ba ha ka UDP kam ju don satia ka jingïakren thnum sharud shakiar hynrei ki kren beit markhmat kum shi para bad dei na kata ka daw ki tip ba haduh mynta hi kam pat don kano kano ka jingïakren haba ïadei bad ka jingkylliang shuki Myntri.
Kumba long mynta hi, ki MLA ka UDP kiba don ha ka kynhun Myntri ki kynthup tang ïa u MLA ka Khliehriat Bah Kyrmen Shylla bad u MLA ka Shillong West, Bah Paul Lyngdoh.