Shillong, Nailar 26 : U Myntri ka tnad Tourism ka sorkar jylla, Bah Paul Lyngdoh ha ka sngi Saitjaiñ u la ong ba ki don haduh kumba 15 lak ngut ki nongwan jngohkai pyrthei kiba wan sha ka jylla ha ka shisnem ban wan peit ïa ka jingitynnad ka mariang.
Ïa kane u la kren ha ka jingïalang plie ïa ka Country Side Resort kaba don ha Mawkhanu,Shillong Byepass jong u Bah Stai Sing Syiem. Ha kane ka sngi la donlang ruh u CEM ka KHADC Bah Pynïaid Sing Syiem kum u Symbud Kongsan.
U Bah Paul u ong ruh ba lada peit ïa ka thain Sohra jan man ki iing ki la buh ïa ki jaka sah na bynta ki nongwanjngoh kai namar ka jingbun ki briew kiba tuid ban wan jngohkai.
Da kaba ai nuksa ba bun ki resort ba pawnam ha Sohra ki don da ki website ban pynsuk ïa ki nongwankai u Myntri u kyntu ruh ïa u trai ka Country Side Resort ban leh lang kumjuh
Ha kajuh ka por u ai ka jingïaroh ïa utei u Rangbah uba la rai ban pynlut shwa nalade ban tei ïa katei ka resort khlem pat pan ka jingïarap na ka sorkar.
“Nga ai ka jingïaroh ia Bah Stai uba khlem pan jingïarap na Secretariat ban leh ïa kane ka projek hynrei u ieng shwa ha la ki jong ki kjat,” la ong u Myntri.
Nalorkata u ong ruh ba ha kane ka juk lada baroh ïa kwah kam sorkar, khamtam ïa ka kam peon bad kam sar ophis baroh 35 lak ngut ki nongshong shnong ka jylla kiba dei hok suda ban ïoh.
“Kumta ka jubab kadei ka kam kamai lyngba ka kam jngohkai pyrthei kaban pynlong ïa ka pateng jongngi ban ïoh kam bad ai kam ïa kiwei ruh.”
Shwa kane na ka liang u Symbud Kongsan u la ong ba kan dei ka jingsahkynmaw ïa ka thaiñ baroh kawei namar katei kadei ka resort ba nyngkong eh ha katei ka thain jong ki watla ki kyrmen ba kin sa nang bun kiwei pat ki resort kiban mih ha ki por ban sa wan.
“Sngewtynnad ban tip ba i Bah Stai i khlem da ap na ka KHADC lane naka sorkr ban kyrshan hynrei i la sdang nalade ban pynbit pynbiang bad pynitynnad ïa katei ka jaka kaba la itynnad lypa,” u la ong.
Ha kajuh ka por u la ong ba katei ka thain ka don ïa ki jaka jngohkai kiba itynnad kynthup ïa kawei kaba don ha Thangshalai kaba ka sorkar ka la kyrshan ban pynitynnad ïa ka. U CEM uba dei ruh u MDC na katei ka thain u la ong ruh ba lada mih kham bunki jaka jngohkai kan long ka kabu ksiar ïa ki samla ka thain ban ïoh kam ïohjam da kaba buh ïa ki resort bad kiwei kiwei.
Na ka liang jong u trai katei ka resort u la ong ba ka jingthmu haba seng ïa katei ka resort kadei namar u ïohi ba katei ka thain ka dang sahdien. “Kumta ka ktik ïa ka jingmut jongnga ban sdang da kaba pynlut shwa nalade bad ban sa leit pan jingïarap na ka sorkar hadien,” u la ong.
La ïoh ruh ïa ka jingkren na u Sordar Shnong Mawpdang nalor kiwei kiwei. Ha katei ka resort la don ruh naduh ka pung ryngkat ki lieng, nangta ka swimming pool bad ruh ki jaka sah ba la shna itynnad.
