Jan baroh ki MLA ngi don ka jingïajan, hynrei ïa ki daw bah jong ka jaidbynriew ngin nym pyndem: HANM

Mawkyrwat, Jylliew 07: U President ba rangbah jong ka Hynñiewtrep Achik’s National Movement (HANM) Central Body, bah Lamphrang Kharbani u la ong, “ka seng ka don ka jingïadei ba jan bha ïa baroh 60 ngut ki nongmihkhmat jong ka jylla” bad ïa kine ki kyntien u pynpaw haba ïa kren bad ki lad patai khubor ha ka 3 tarik u Jylliew, 2022 hadien ka jingpyllait ïa ka kali kit nongpang jong ka HANM Mawlangwir Unit.
Hynrei u la shai pat ba watla u don ka jingïadei kaba jan bha bad ki nongmihkhmat tangba um lah pat ban pynïadei bad ka mat jingdawa ne issue jong ka jaidbynriew namar kum ka seng halor kane ka bynta kam ju pyndem ban pynsaw ïa ka sur ban dawa ïa ki hok jong u paidbah, ong u bah Lamphrang.
Namarkata, u bah Kharbani u la kyntu ïa ki paidbah jong ka Bri u Hynñiewtrep ba kim dei than eh ban shu pynlut por beit tang ban kynnoh ne kren lorni ha ki jingthoh ne comment namar kim long kiba shongnia bad kiba pynsngewtynnad hynrei ki long pynban ka jing-i-biej bad sngewpoh dor ban ïa beiñ paradoh parasnam
Kumta, u bah Lamphrang Kharbani u la khot la wer ïa ki paidbah jong ka Bri u Hynñiewtrep ba ïa mih paidbah ha ka sngi ka ban sa pynlong ïa ka jingïalang ha Nongbah Shillong ka ban sa khot da ka Joint Action Committee Border jong ka Meghalaya (JACBOM) ka ban sa pynlong shen ha kine ki sngi ban sa wan, na ka bynta ka jinglilam jong ka sorkar ïa ka khyndew ka shyiap jong ka Meghalaya sha ka sorkar Assam ha kane ka jingpynbeit pud kaba nyngkong jong kine ki ar tylli ki jylla.