Jan 50 persen hiar ka jingïap ki longkmie ha ka por kha khun, 30 persen ki khunlung

Shillong, Rymphang 16 : Ka jingdon ki longkmie ba armet ba ïap ha ka por ba kha khunlung ka la hiar sha ka 50 persen naduh ba pyntreikam ïa ka Chief Minister’s Safe Motherhood scheme, ong u Lat ha ka jingkren lamphrang ha ka sngi sdang jong ka Dorbar Mangtyngka ha kane ka sngi ka sngi Thohdieng.
“Ïa ka jingtreikam jong ki 140 tylli ki transit home la pynkhlaiñ shuh shuh da kaba kyntiew kyrdan ïa ki 20 tylli ki Community Health Centre sha ki Referral Unit,” ong ka jingkren lamphrang u Lat da kaba kdew ruh ba ka koit ka khiah ka la kiew stet ha kine ki khyndiat snem ha kane ka jylla.
La kdew ruh ba ki don kumba 24.87 persen ki khunlung ba dang kha kiba la ïoh ïa ka tika. Nalorkata, la kdew ruh ba ka la don ka jinghiar haduh 30 persenka jingkhlad noh ki khunlung por dang kha, kaba long ka sienjam kumba thaw rekod ha ka koit ka khiah ha ka jylla.
Shuh shuh la ïathuh ba ka sorkar jylla ka la lamkhmat ruh ban pyndonkam da ka bording na ka sngi (solar energy) ha ki palat 400 tylli ki sub-centre bad ha kumba 50 tylli ki primary health centre bad kiwei kiwei ki jaka sumar.
‘Dei na kane ka daw ba ha ka sien kaba nyngkong ba la lah ban pynkha khunlung ha ki sub-centre.”
Ban pynkhlaiñ ïa ka tnad ka Koit ka Khiah, la ïathuh ba ka Medical Recruitment Board ka la dep ban thung haduh 47 persen ki kam ba shong thylli tang ha ka shisnem.
“Ka sorkar ka la dep ruh ban pyllait palat 6 klur tyngka lyngba ki 6,500 tylli ki Village Health Council ban pynkhlaiñ ïa ka jingsnohkti paidbah ha ka koit ka khiah ha ki shnong ki thaw.”
Ha kajuh ka por la kdew ba ka sorkar jylla lyngba ka Early Childhood Development Mission kan pyntreikam ha ki 5,630 Anganwadi centre na ka bynta ban pynïoh jingmyntoi ïa ki 50,000 ngut ki khynnah bad 9,000 ngut ki longkmie armet bad ki longkmie ba rit khun.
La pyntip ruh ba haduh 2,148 tylli ki centre ba rim yn sa kyntiew kyrdan noh bad ka sorkar ka buh thong ruh ban pynpoi shuh ïa ki shlem treikam jong ki Anganwadi sha ki 1,554 tylli ki shnong ki bym pat don ïa kitei ki centre.
Shuh shuh la kdew ruh ba ïa ka Meghalaya Project for Adolescent Wellbeing, Empowerment, and Resilience (MPOWER) la pynwandur ha kata ka rukom ban peit ïa kiba dang khie bad kumjuh ïa ki samla.
Na ka bynta ban ïakhun ïa ka jingshyrkhei u drok, la pyntip ruh ba ka sorkar jylla ka la dep ban pyllait paidbah ïa ka thong treikam ba tip kum ka Drug Reduction, Elimination & Action Mission (DREAM).