Shillong, Jylliew 29 : La jan dap 200 klur tyngka ka jingjulor tang ki surok bad jingkieng na ka jingther u lapbah kaba la wanrah ka jingshlei um bad jingtwa ki surok ha ka jylla baroh kawei.
U Symbud Myntri Rangbah uba dei peit ïa ka tnad PWD (Roads) u bah Prestone Tynsong ul a ong “ Ngi la lum jingkheiñ malu mala bad ki jingshah pynjulor jong ki surok bad jingkieng haka jylla kim duna shuh ïa ka 165 klur haduh 180 klur ei ei bad na ka liang ka tnad PWD ka la dep phah ïa ka kaiphod jingkheiñ jingdiah sha ka tnad Revenue khnang ban mang pisa na ka bynta kine ki jingshah pynjulor. Kine ki jingkheiñ jingdiah ba la phah sha ka tnad Revenue ki kynthup ïaka Garo Hills, Khasi Hills, Jaintia Hills bad Ri Bhoi District”.
U la ïathuh ba ka kynhun Inter Ministerial Central Team (IMCT) ruh ka la wan poi ha ka nongbah ha ka Sngi Ba Ar bad kin sa leit ban jurip da lade sha kito ki jaka ba shah pynjulor hangne ha ri lum Khasi bad Jaintia bad kumjuh ruh sha ri lum Garo.
ïa kane ka kynhun na ka sorkar pdeng la phah da u myntri ka tnad kam pohïing ka ri u Amit Shah hadien ba ula dep ïakren bad u Myntri Rangbah ka jylla u Conrad K Sangma bad kumjuh ruh bad u Mytnri Rangbah ka Assam u Himanta Biswa Sarma namar kane ka kynhun kan jurip ha baroh ar ki jylla.
Kumba 35 ngut ki briew ki la iap bad 11 ngut kiba dang jah rngai ha kane ka jingtwa, jingshlei um ha ka jylla.
