Jan 2 snem duna ha Mawlasnai bad 3 bnai ha Mawhati PHC khlem doktor, shitaïew ai por ban thung

Nongpoh, Ïaiong 09: Ki khun samla jong ka thaiñ Mawhati kila pynpaw ka jingsngew halor ka jinglong jingman ha kaba ïadei bad ka jingshakri ïaka koit ka khiah hadien ba ka sorkar kala shu iehnoh beiñ ïaki paidbah katei ka thaiñ khlem doctor haki ar tylli ki PHC ba kynthup ïaka Mawhati PHC bd ka Mawlasnai PHC.
Kane ka jingbym kheiñ snep ka sorkar bad ka jingbym patiaw ïaka koit ka khiah ki paidbah haka thaiñ nongkyndong kala wanrah ka jingeh kaba khraw ïaki paidbah katei ka thaiñ namar ki don shibun ki nongpang man ka sngi kiba leit phah sumar bad kiba leit wad dawai hynrei ym don doctor ba peit bad khmih ïaki watla kiba bun ki wan naki shnong ba kham jngai bad kumjuh naka longiing ba duk ba rangli ba kim don lad ban leit sha kiwei ki jaka sumar ba kham bha sha sor ne kiwei kiwei ki jaka bad halor kane ka bynta naka liang kitei ki samla kila leit ban ïakynduh syndon ïaka DMHO ka Ri-Bhoi ban ai da ka jingthoh bad ban pynthikna ba ki doctor kin biang mardor ha kitei ki jaka sumar.
Haba kren sha ki lad pathai khubor naka liang u Samla Donald Muktieh bad u Bah Shanlang Diengdoh kila ïathuh ba ha Mawlasnai PHC la jan 2 snem ym don doctor bad kumjuh ruh ha Mawhati PHC la kumba 3 bnai eiei ha kaba kum ki khun samla ka thaiñ kim don jingtip na kaei ka daw bym lah ban buh doctor ha kitei ki jaka sumar jong ka sorkar.
“Ngi sngewthuh ki jingeh kiba bun ki mih haba ym don doctor, namar ki nongpang ki don man ka sngi bad wan ruh naki lynti kiba jngai, bad kane ka wanrah ïaka jingsngewsih bad ka jingsngew diaw ïaki nongshong shnong kiba duk kiba kyrduh kaba long kum ka jingshah ibeiñ haka sorkar” la ong kitei ki samla da kaba bynrap ruh ba kane baroh ka dei hi ka jingleh jong ka sorkar namar wat u Myntri ka tnad ka koit ka khiah u kubor ba ki doctor kim jut reh ban leit trei sha ki jaka ba kham kyndong.
Haka jingshisha ka sorkar kala dei ban pynduh ïaka laisen jong kito ki doctor kiba kyntaid ban trei bad ban shakri sha ki kyndon kynshrot ka jylla kaba ki paidbah ki donkam, hynrei kane ka sorkar ka sngewtynnad ban pynmih ïaki polisi kiba dei naka bynta ka jingmyntoi shimet bad ban pynlut phut ïaka pisa paidbah, hynrei kam lah ban ai wat tang uwei u doctor sha nongkyndong.
Kane ka jingleh ka sorkar bad ka jingbym don doctor ha kitei ki jaka sumar ka wanrah ruh ka jingjia ba sngewsih kumta naka liang ki khun samla ki ai por 1 taiew ïaka sorkar ban buh doctor ha kitei ki jaka sumar lym kumta naka liang jong ki kin shim pat da kiwei ki sienjam wat ban khang tala noh namar kam don jingmut ban don ka jaka sumar khlem ki doctor, kaba long tang ka shynrong khlem ka jabieng.