SHILLONG, Kyllalyngkot 29: Ki resol jong ki jingïalehkai ka lympung phutbol ki heprit kiba hapoh 14 snem kaba la tip da ka SSA U-14 Football league 2025-26, kiba la long hynne ka sngi Palei (29.01.2026).
Ha ka jingïakhun ba nyngkong, ka Laitkyrhong SC ka la pynliem noh da 4-0 kol ïa ka Mawtawar SC. U R.Mylliem (16, 25 & 57’) u la thep hat trick, katba kawei ka kol la thep da u D.Rynjah (18’).
Ha ka jingïalehkai kaba ar, ka Shillong Lajong FC bad ka Umphyrnai SC ki la pynkut ïa ka jingïakhun da kaba ïakhaid khlem kol (0-0).
Ha ka jingïalehkai kaba lai, ka Summit Academy ka la khur ïa ka jingjop da kaba pynliem noh da 4-1 kol ïa ka Nongrah SC.
Ka shi kol jong ka Nongrah SC la thep da u J.Marboh (40), katba ïa ki saw kol jong ka Summit Academy la thep da u T. L Marshangbai (1’), D.Kahit (7’), R.Syiem (23’) bad u M L Rngaid (31’).
Nangta ha ka jingïalehkai kaba saw, ka Nongthymmai SC ka la jop da 2-1 kol ïa ka Mawlai SC. ïa ki ar kol jong ka Nongthymmai la thep da u D.Nongkhlaw (11’) bad u C. Warjri (60’), katba ïa ka Mawlai SC la thep da u M.Marwein (9’).
Ha ka jingïalehkai kaba san, ka Langsning FC ka la pynliem noh ïa ka Pynthorbah SC da 2-0 lyngba ki kol ba la thep da u D.Syiem (24’) bad u D.L Nongbri (45’).
Ha ka jingïakhun ba khatduh ka New Challenger SC ka la jop da 3-0 kol pyrshah ïa ka Sohiong SC. U I.Khongjee (46 & 49) u la thep ar kol na ka bynta ka New Challenger, katba kawei ka kol kadei kaba la kum thep hi (Own goal) ha ka minit kaba 27.
