Shillong, Jylliew 28: Ka lympung ïalehkai Under-20 Fourth Division 2024 jong ka SSA ka la jam shakhmat ha kaba ka Thynroit SC ka la plie pyrda ïa ka jingïalehkai ba nyngkong ban jop haduh 8-1 kol ïa ka Mawreng SC ha First Ground, Polo, hynnin ka Sngi Palei.
Kane ka dei ka jingïalehkai ba nyngkong jong ki lympung ba la pynlong da ka SSA na bynta ka samoi 2024 ha kaba la ïadon ryngkatlang ki dkhot nongkitkam ka synjuk, kynthup ruh ïa u President – Bah Banteidor Lyngdoh, MLA-Mawkynrew, u ba la plie pyrda ïa kane ka lympung shuwa ban sdang ïa ki jingïakhun.
Ha kane ka jingïakhun ki la don haduh 7 ngut ki player ka Thynroit kiba la ïoh pynkhihjar– u Carrick Nongrum u ba la thep ar kol (56′, 58′), u Lastingson Lawai (13′), u Silvestar Warlarpih (15′), u Arphrangstone Warlarpih (30′),u Cleofast Ksiar (66′), u Johnly Kharsahnoh (67′) bad na u Fairly Nongspung (70′).
Katba ka shi kol na bynta ka Mawreng la pynkhih da u John R Nongkhlaw (62′).
Kumba ju long barabor, ka Fourth Division la pynïalehkai 70 minit ka por. Bad mynta u snem ki kynhun ki lah ban soi san ngut ki player kiba la palat ïa ka 20 snem ha ka kynhun jong ki 25-ngut, hynrei la shah tang lai ngut ban mih madan ha ka Starting XI. Ki ar kynhun ba bat kyrdan ba hakhmat na man ki Group (hynriew tylli) bad saw tylli ki kynhun kyrdan ba lai ba kham biang ki lah ban ïoh rung sha ka pre-quarterfinal.
Haba phai sha ki ar tylli ki jingïakhun ba la long hynne ka sngi Thohdieng (28 tarik Jylliew, 2024), ka Madan S&CC bad ka Mawnianglah Youth SC ki la khur ïa ka jingjop ha ki jingïalehkai jong ki ba la long ha SSA Ground, Polo.
Ka Madan S&CC ka la lah ban pynliem ïa ka Golflink SC da 3-1 kol. U Phermanbha Lyngdoh u la thep ar kol na bynta ka Madan S&CC, kawei ha ka 18 bad kaba ar ha ka 67 minit, nangta bad ka shi kol na u Anderson Nongkynrih ha ka 61 minit.
ïa ka shi kol na bynta ka Golflink SC la pynphai da u Willborn Langstieh ha ka 19 minit.
Haba phai sha ka jingïakhun kaba bud, ka Mawlyngngad SC ka la shah pynliem noh ha ka Mawnianglah Youth SC da 2 kol. Kine ki ar kol na ka Mawnianglah Youth SC la thep da u Frenchester Nongkhlaw ha ka 17 bad 21 minit jong ka kylla step.
