Jam ki jingïalehkai U-15 Boys & U-17 Girls sha ka final
EKH District Level Inter School Subroto 2025
SHILLONG, Jylliew 04: Ka lympung ïalehkai District Level Inter School Subroto Mukherjee Cup Football Tournament 2025′ bala pynïaid da ka ophis treikam u District Sports Officer (DSO) East Khasi Hills District, ka la jam shakhmat ha ka sngi kaba saw, ha kaba ïa ki jingïalehkai la pynlong ha Madan Heh-Mawlai bad ha SAI, NEHU Campus.
Ha ka kyrdan ïalehkai Under-15 jong ki khynnah shynrang, ki kynhun ba dang sah ki long ka Assam Rifles Public School bad ka O. M. Memorial Hr. Sec. School, ha kaba kine arliang kin ïaknieh ïa ka nam lahduh ha kane sngi Thohdieng ka 06 tarik Jylliew, 2025, ha madan heh Mawlai, ha ka por 12 shiteng mynsngi.
Baroh ar tylli ki kynhun ki la jop ïa la ki jong ki jong ki jingïakhun semi final ba la long hynne ka sngi Palei. Na ka liang jong ka Assam Rifles Public School ka la lah ban pynliem noh ïa ka St. Anthony’s HR. SEC. School da 2 kol. Katba ka O. M. Memorial Hr. Sec. School ka la pynliem noh ïa ka Umphyrnai Presbyterian Sec.School da 2-1 kol ban ïoh rung sha ka final.
Kumjuh ruh ha ka liang jong ki kynthei kiba hapoh 17 snem ka jingïakhun ka la jam sha ka final ha kaba ka Tyrsad Hr. Sec. School kan aireng pyrshah ïa ka Sacred Heart Boys’ Hr. Sec. School na ka bynta ka nam lahduh, ha Madan Heh Mawlai, mynta ka 06 tarik Jylliew, ha ka por 11 baje mynstep.
Ha ka jingïakhun ïa ka semi final ki samla lud jong ka Tyrsad Hr. Sec. School ki la pynjemkhnap haduh 6 kol ban pynkhyllem noh ïa ki thei ïalehkai jong ka Mawngap D.C.M. Hr. Sec. School. Katba ki thei ïalehkai jong ka Sacred Heart Boys’ Hr. Sec. School ki la pynliem pat ïa ka Iewrynghep Sec. School da 2 kol ban jam sha ka final.
Haba phai pat sha ki lai tylli ki jingïalehkai ha ka kyrdan jong ki khynnah shynrang kiba hapoh 17 snem ha SAI, NEHU Campus, la sakhi ïa ka Government U. P. School, Mawryngkneng kaba la pynliem noh ïa ka Sawmer Presbyterian Sec.School da 5-0 kol.
Nangta ka Mawngap D.C.M. Hr. Sec. School ka la khur ïa ka jingjop lyngba ka tie breaker da 4-2 pyrshah ïa ka St. Gabriel HR. SEC. School hadien ba ïakhaid khlem don ba lah thep ha ka por ba la buh.
Kaba khatduh la sakhi ïa ka St. John Bosco Boys HR. SEC. School kaba la jop da 2-0 kol pyrshah ïa ka Grace Academy Secondary School.