SHILLONG, Rymphang 05: Ki jingïakhun semi final jong ka Shillong Sports Association (SSA) U-12 Football League bad U-14 Football League 2025-26 ki la long hynne ka sngi Palei (05 tarik Rymphang) ha madan SSA Ground, Polo.
Ha ka lympung ïalehkai jong ki khynnah ba hapoh 12 snem, ka Shillong Lajong FC bad ka Nongthymmai Nongkynrih SC ki la jop ïa la ki jong ki jingïakhun semi final ban pynthikna ïa ka phainal hapdeng jong ki, kaba la buh ban long ha kane ka sngi Saitjaiñ (07/02/2026), ha ka por 1 baje nohphai sngi.
Ka Shillong Lajong FC ka la lah ba kan pynliem noh ïa ka Umphyrnai SC da 4-2 lyngba ka penalty shootout hadien ba ki la ïakhaid mar 1-1 kol ha ka jingïakhun.
Nangta ka Nongthymmai Nongkynrih SC ka la pynskhem ïa ka jaka ha ka phainal da kaba jop 3-0 pyrshah ïa ka PFR FA. U D.Lyngdoh u la pynkhihjar nyngkong ha ka minit kaba 8, shuwa ba u R.Kharshandi un pynbud da kaba thep ar tylli ki kol (9 & 36).
Ka jingïaknieh nam lahduh ha ka kyrdan ïakhun jong ki khynnah ba hapoh 14 snem kan long hapdeng ka Mawkhar SC bad ka Langsning FC, hadien ba ki la jop ïa la ki jong ki jingïakhun Semi final.
Ka Mawkhar SC ka la pynliem noh da 4-2 kol ïa ka Umphyrnai SC. ïa ka Mawkhar SC la pynkhihjar da u S.Syiemiong (6), u Mawsor (48) bad u N.Nonglait (67’), katba kawei kadei kaba la kum bakla thep hi da u khynnah ïalehkai jong ka Umpyrnai (29’). Ki ar kol jong ka Umphyrnai la thep da u B.Kharkongor (11’) bad u A.Nongdhar (20’).
Ha ka semi final kaba khatduh, ki ar kol jong u N.Mukhim (17 & 36’) ka la ïarap ïa ka Langsning FC ba kan pynliem noh da 2-1 kol ïa ka Nongthymmai Nongkynrih SC. Ka Nongthymmai NSC ka la pynphai ïa ka shi kol lyngba u B.Dkhar (67’).
Kumta kine ki arliang, ka Mawkhar SC bad ka Langsning FC kin pynkhreh ban aireng ha ka phainal ha kane ka sngi Saitjaiñ (07/02/2026), ha ka por 2:30 baje nohphai sngi.
Shuwa kane, kan don ka phainal jong ka SSA U-12 Football league 2025-26 hapdeng ka Shillong Lajong FC bad ka Nongthymmai Nongkynrih SC ha ka por 1 baje nohphai sngi. Baroh ar tylli ki jingïakhun phainal kin long ha SSA Ground, Polo.
