Shillong, Nailur 13: Ka jingïalehkai group stage kaba khatduh jong ka lympung Second Division Football League 2025 jong ka Shillong Sports Association ka la poi sha kaba kut ha ka sngi Saitjaiñ, ha kaba ka Marbisu ka la pynliem ïa ka Umphrynai da 3-0 kol, katba ka Mawryngkneng ka la pynliem ïa ka Umphrup 3-1 kol.
Da kane ka jingjop ka Mawryngkneng ka la kiew sha ka kyrdan ba nyngkong ha ka Group C. Ha ka jingïalehkai u Iohbor Mukhim (2′), u Rishot Sari (5′) bad u Andy Kharsati (47′) ki la pynkhihjar na ka bynta ka Mawryngkneng, katba u Nangskhemlang Wahlang (22′) u la thep ïa ka shi kol na ka bynta ka Umphrup.
Shuwa kane, ha ka Group B, ka Marbisu ka la pynjemkhnap ïa ka Umphyrnai da ka hat-trick jong u Fildy Star Nongbet (27′, 34′, 51′). Hynrei kam shym la don kano kano ka jingkylla ha ki kyrdan, namar ba ka Marbisu ka la pyndep hadien ka Smit da ka jingïapher kol (ki arliang mamla ki la ïakhaid, kumta ka jingïalehkai mar pyrshah kam don jingktah ei ei).
Ki kynhun kiba la jam sha ka Quarter final ki long ka Mylliem Lum SC, Laitkyrhong SC, Mawryngkneng SC, Mawpat, Sohryngkham SC, Tynring SC, Marbisu SC bad ka Smit.
Ka jingïakhun Quarter final kaba nyngkong kan long hapdeng ka Mylliem Lum SC pyrshah ïa ka Laitkyrhong SC ha ka por 4:15 baje nohphai sngi, ïa kaba yn pynlong lashai ka sngi (16 tarik Nailur, 2025).
