Nongpoh, K’Lyngkot 02: Ka Shnong Saiden ha Ri-Bhoi District kaba long kawei naki shnong kaba la rim bha kaba don la ka khana hapoh ka Hima 12 Lyngdoh kaba don harud ka surok bah NH-6 ha ka sngi Baar kala ioh ban lehkmen bad rakhe ïa u mawmer ba 125 snem ka jingïaid lynti naduh bala seng ïaka ha u snem 1900 hapdeng shibun ki jingkylla haka jingïaid ka por kynthup ka jingkiew ki samla haka pule ka puthi.
Ïa kane ka jingrakhe la sdang naduh ka por mynstep lyngba ka jingshim bynta shitrhem naduh ki heprit, ki khun samla lem bad ki longkmie longkpa jong ka shnong haki jingïalehkai bapher bapher ban pynphuh pynphieng ïa kane ka sngi.
Ha kane ka sngi ka jinglehkmen jong ka jingdap 125 snem ka shnong Saiden la sakhi ruh da ka jingdonlang u Dr Celestine Lyngdoh MLA ka Umsning kum u kongsan, haka jingdonlang u Bah B Nongmalieh Rangbah Shnong ka Mawtnum, Bah EJ Myrthong Rangbah Shnong Saiden, Dr HJ Syiemlieh, Bah SL Wahlang Notary Officer ka D&SJ Nongpoh, ka kong RB Lyngwa District Sericulture Officer bad kiwei kiwei ki riew rangbah jong ka shnong.
Ha kane ka sngi la ioh ruh ban plie paidbah ïa u mawnongrim ban sah jingkynmaw jong ka jingdap 125 snem ka shnong Saiden hakhmat ka iing Dorbar, ryngkat ki kam pynroi ba kynthup ïaka VIP Gallery bad ka surok shnong ha madan Saiden bala aiti da u MLA ka Umsning ryngkat ka jingpynlait ïaka thup sah kynmaw jong ka shnong ne ka Souvenir da u kongsan lem bad ki riew rangbah.
Kum ka jingkynmaw burom ïa u Rangbah Shnong u ba la prat lynti ban kyntiew ïaka shnong Saiden u Bah EK Lapang u ba dang shu khlad noh na kane ka sla pyrthei, naka liang ka shnong kala pynlong ruh ka jingsngapjar ba shi minit ryngkat ka jingpynkup burom ïa ki bahaiing jong utei u rangbah u la noh synñiang shibun sha ka shnong Saiden ha shuwa ba un khlad noh kum u Rangbah Shnong katei ka shnong.
Shuh shuh kum ka jingsngewnguh naka liang ka shnong Saiden kala pynkup burom ruh ïaki nongïalam shnong naduh kiba mynshuwa haduh kiba mynta, ki samla pule kiba wan shakhmat haki jingpule bapher bapher bad kiwei kiwei kiba la wanrah nam bad burom ïaka shnong.
Haba kren ha kane ka sngi naka liang ki nongïalam shnong ka shnong Saiden kila pynpaw ba ka jingsngewkmen hadien ka jingïaid lynti jong ka shnong ban jam ïa u mawmer ba 125 snem namar kadei kawei naki shnong kaba rim haka thaiñ Nongpoh, ha kaba kum ka shnong watla ka ïaid lynti lyngba bun ki rai eh ki rai dam hynrei mynta kala long kawei naki shnong kaba kiew sted haka liang ka roi ka par, ka jingkiew ki samla kiba la nang la stad bad kiwei kiwei.
U Dr C Lyngdoh haba kren ha kane ka sngi kum u kongsan u la ong ba ka shnong Saiden kadei kawei naki shnong kaba u sngewsarong ban ïathuh khana sha ki briew namar kadei ka shnong kaba u ieid bad sngewtynnad naduh ki por ba mynshuwa namar katei ka shnong kala kiew sted haka liang ka roi ka par namar ki nongïalam shnong kila pyndep hok ïala ka kamram ka jong ki.
U mot tei nam ba ka shnong Saiden kala tei un long u sakhi ïaki samla kiban sa shimti ïa kam nongïalam ha katei ka shnong ba kin tip ïaka mynnor bad ka jingïaid lynti ka shnong, ryngkat ka jingkitbok ïaki nongïalam shnong kiba mynta ba kin dang lah ban lam lynti ïaka shnong sha ka jingsarong.
