SHILLONG, Kyllalyngkot 07: Ka Mawlai Games & Literary Fest ka la ïaid mynta sha ka sngi kaba saw hynne ka sngi Balang ha kaba la sakhi ïa bun ki jait jingïalehkai kiba kynthup ïa ka Arm Wrestling, Athletics, Badminton, Boxing, Football 2nd Round bad ka Quiz Competion.
Ha ka jingïalehkai Arm Wrestling bad ka Athletics, la lah ban pyndep lut hynnin ka sngi ha kaba ka Mawlai Umthlong ka la long ka shnong ka la long ka lahduh ha ka Arm Wrestling ha kaba ka la ïoh 5 tylli ki takma ksïar, 2 tylli ki takma rupa bad ka wei ka takma rnong katba ka shnong Mawlai Kynton Massar ka la long ka lahduh ha ka Athletics ha kaba ka la khur haduh 16 ki takma ksiar 7 tylli ki takma rupa bad 9 tylli ki takma rnong.
Ha ka Badminton bad Boxing la lah ban pyndep lut ïa baroh ki wat lem bad ki Semi Final bad ka jingïalehkai Final jong kine ki ar tylli ki jingïalehkai kan long mynta ka sngi Palei.
Ha ka Football, la lah ban pyndep ïa ka jingïalehkai jong ka wat kaba ar bad ka jingïalehkai Quarter Final kan long mynta ka sngi Palei ha kaba ka Umshing kan ïakhun pyrshah ïa ka Mawiong Umjapung, ka Nongpdeng pyrshah ïa ka Nongkwar, ka Umthlong pyrshah ïa ka Mawdatbaki bad ka Mawsiatkhnam pyrshah ïa ka Syllaikariah.
Ha ka Quiz jong ka Category A bad Category B la rah da ka shnong Umjaiur bad ka Umthlong.
