SHILLONG, Kyllalyngkot 06: Ka Mawlai Games & Literary Fest 2026 kaba la jam mynta sha ka sngi ba lai ka la sakhi ïa ka jingïashimbynta shitrhem jong ki khynnah, ki samla bad wat ki rangbah ruh na ki dong bapher bapher jong ka shnong Mawlai ha ki jingïalehkai bapher bapher kiba kynthup ïa ka Athletics, ka ïakura ne ka Boxing, ka ïakop tyrko (dabate) lem bad kiwei kiwei.
Ha kane ka sngi la ïoh ban sakhi ïa ki heprit ka shnong Mawlai kiba la pynshisha ïa ka sap ïalehkai jong ki ha ka rynsan ïakura (Boxing) kaba la sdang hynne ka sngi ha ki lai tylli ki kyrdan ïakhun (category) katkum ka rta jong ki nongïalehkai; kata naduh 12-14 snem, 14-16 snem bad 16-18 snem jong ki shynrang ha ki kyrdan jingkhia bapher bapher. Ka jingïalehkai Boxing kan dang bteng mynta ka sngi sa ha kiwei pat ki rta bad ki kyrdan jingkhia jong ki shynrang bad kynthei.
Kumjuh, la ïoh ban pyndep ïa shibun ki jingïalehkai ha ka Athletics, kiba kynthup ïa ka ïakop mareh bad ki jingïalehkai bapher bapher ha madan (track & field event) jong ki Under-14, Under-16, Under-18 bad Senior jong ki kynthei bad shynrang. Ki jingïakop ha ka Track Event ki kynthup ïa ka jingmareh kaba 60 mitar, 100 m, 200m, 400m, 600m bad 5000m. Ha ka Field Event ki jingïalehkai ki long ha ka Long Jump, High Jump, Shot put bad Javelin Throw. Na ka bynta ka phainal yn pynlong mynta ka sngi.
Ha ka Basketball, ka jingïakhun ka la sah satang ka phainal, ha kaba ka Nonglum ka la pynliem noh ïa ka Nongkwar katba ka Mawdatbaki ka la pynliem noh ïa ka Mawiong Umjapung ban buh jaka ha ka phainal ha ka liang ki kynthei. Katba jong ki shynrang pat ka Mawiong Umjapung ka la jop ïa ka Nonglum, nangta ka Iewrynghep ka la pynliem ïa ka Mawdatbaki ban pynthikna ïa ka jaka ha ka final. Ka jingïakhun Final jong ka Basketball la buh ban pynlong ha ka 09 tarik u Kyllalyngkot 2026.
Haba phai sha ka Football, ka Mawsiatkhnam ka la jop ïa ka Kynton Massar da 2-1, ka Umthlong ka la pynliem da 2-0 kol ïa ka Mawiong Rim, ka Syllaikariah ka la pynjemkhnap da 5-0 kol ïa ka Umjajew, bad ka Nongkwar ka la jop da 3-0 kol ïa ka Madan Mawkhar.
Ha ka Literary Competition jong ka jingïakop tyrko kaba ka phang jong ka Category A ka dei “Ka Social Media ka long ka jingkyrkhu ïa ka Jaitbynriew” la jop da ka Diamond Kharshandi na Mawiong Umjapung bad uba jop pat ïa ka Category B u dei u Frederick Mylliem Umlong na Umthlong bad ka phang kaba ki ïa tyrko ka dei “Ka jingpyndonkam Artificial Intelligence da ki samla pule ka kyntiew ïa ka pule ka puthi ha ka Jylla”.
