SHILLONG, Kyllalyngkot 08: Ka Mawlai Games & Literary Fest 2026 kaba la ïaid mynta sha ka sngi kaba san ka la lah ban pyndep ïa ki Final jong ka Badminton, ka Final jong ka Traditional Archery, ki katto katne ki Final jong ka Boxing bad ka Quarter Final jong ka Football.
Ha ka Quarter Final jong ka Football, ka Mawiong Umjapung ka la jop ïa ka Umshing da 3-1, ka Nongkwar ïa ka Nongpdeng da 4-0, ka Mawdatbaki ïa ka Umthlong da 5-0 bad ka Syllaikariah ïa ka Mawsiatkhnam da 3-1.
Ka Semi Final kan long mynta ka sngi hapdeng ka Mawiong Umjapung pyrshah ia ka Mawdatbaki bad ka Nongkwar pyrshah ïa ka Syllaikariah.
Ha ka ïakop siat khnam Traditional Archery, ka Kate Diamond Lyngdoh na Kynton Massar ka la long ka nongjop ha ka liang ki kynthei bad u Charles Manih u la long u nongjop ha ka liang ki shynrang.
Ha ka Badminton, la lah ban pyndep ïa baroh ki Final jong kane ka jingïalehkai kaba la phiah ha ki 2 bynta bad kita ki long ka Under-16 bad ki senior jong ki Kynthei bad Shynrang ba la pynïalehkai ha ka Single, Double bad ka Mixed Double.
Ha ka Team event jong ka Badmindon, la rah da ka Mawdatbaki bad kaba wan ba ar ka dei ka Iewrynghep.
Ha ka Boxing, la lah ban pyndep 16 tylli ki Final Bout jong ki kynthei bad shynrang bad kiba dang sah ki long sa 6 bout ki Final kiba yn sa pynïalehkai ha ka 10 tarik u Kyllalyngkot 2026 ha shwa ban sdang ka Closing Ceremony jong ka Mawlai Games & Literary Fest kaba long ha Basketball Court, Mawlai Nonglum (Iew Nonglum).
Lah ban kdew ruh ba ka Final jong Basketball kan long mynta ka sngi hapdeng ka Nonglum pyrshah ïa ka Mawdatbaki ha ka liang ki kynthei bad ka Mawiong Umjapung pyrshah ïa ka Iewrynghep ha ka liang ki shynrang bad hadien ka Final kan don sa ka Medal Ceremony ha kaba i BDO jong ka Mawlai C&RD Block, i Kong D. Lyngdoh in long i Kongsan.
