Jowai, Nailar 01 : Ka jingïalehkai phutbol ‘5th Debo Shullai Memorial Trophy’ 2nd Division Football League Cum Knockout Tournament-2022 bala pynïaid da ka West Jaiñtia District Sports Association (WJDSA) kaba la long mynta ka sngi ha madan Kiang Nangbah Stadium Jowai.
Haba phai sha ka jingïakhun ka kynhun ïalehkai jong ka Lion Sports and Youth Affairs kala lah ban pynliem da 3-1 kol ïa ka Pynthorlangteiñ. Ïa kitei ki lai kol na ka Lion Sports and Youth Affairs la thep da u Chiruplang Pdang ha ka minit ba 34, u Chanmitre Dkhar ha ka minit ba 41 bad u Sanborlang Kharshohnoh ha ka minit ba 49.
Katba na ka liang ka kynhun jong ka Pynthorlangteiñ ka la ïoh ban thep ïa katei ka shikol lyngba u Balongshwa Surong ha ka minit ba 32.
Na ka bynta Pool-A ka Lion sports and Youth Affairs kala long kum ka Top team, katba ka kynhun West Madan Mustem kala poi ha ka kyrdan 2nd Top team.
Ka jingïakhun ‘Quarter Final’ kan long ha ka 3 tarik u Nailar hapdeng ka Lion sports and Youth affairs pyrshah ïa ka Khliehïongriang ha ka por 2 baje nohphai sngi, katba ka NSA ka ïakhun pyrshah ïa ka Mookyndur ha ka por 4 baje janmiet.
