Tura, Kyllalyngkot 18: Ki thei ïalehkai football jong ka Ri Bhoi District ryngkat bad ka East Khasi Hills District ki la jam pat mynta sha ka phainal jong ka jingialehkai phutbol ha ka lympung ialehkai Meghalaya games kaba san.
Haba phai sha ka jingiakhun semifinal ba la long hynne ka sngi ha PA Sangma Stadium, Tura, na ka liang ki thei ïalehkai jong ka Ri-Bhoi District ki la lah ban pynkhyllem noh ïa ki thei ïalehkai ka Eastern West Khasi Hills District da namjop kaba haduh 5-1 kol.
ïa ka nam tam ha kane ka jingïakhun ka la leit sha ka Imaia Shylla hadien ba ka la lah ban thep marwei haduh 4 tylli ki kol, katba ïa kawei pat ka kol la ïoh ban thep da ka Rimika Khongkai.
Na ka liang jong ka Eastern West ka shi kol ba pynphai la thep da ka Rympeibasuk Syiemlieh.“ Haba phai pat sha ka jingïakhun ki thei ka East Khasi Hills, ka kynhun ka la lah ban khur ïa ka namjop kaba suk da kaba pynjemkhnap haduh 5-0 kol ïa ka South West Khasi Hills.
Hangne ka nam tam haduh kaba kut jong ka jingïakhun la khur da ka Inrilaidor Khongthaw, hadien ba ka la lah ban ïalehkai bha bad thep ruh ïa ar tylli ki kol, katba ïa ki kol ba sah jong ka kynhun la thep ïa ki da Melaribha Lyngdoh, nangta ka Ibashembha Khongsit bad ka Ideibanrishisha Kharpan.
Kine ki ar kynhun, ka Ri Bhoi District bad ka East Khasi Hills District kin sa hap ban aireng pyrshah ban ïaknieh ïa ka namlahduh ha ka Meghalaya Games.
