NEW DELHI, ïaïong 01: Ka India ka la kiew san kyrdan ha ka thup jong ka FIFA ranking ba thymmai hadien ba ka la jop da 2-1 ïa ka Hong Kong-China ha ka jingïalehkai ba khatduh jong ka ha ka lympung AFC Asian Cup 2027 Qualifiers ha ka sngi Ba-ar.
Ka India ka la jam shakhmat na ka kyrdan ba 141 sha ka kyrdan ba 136 ha ka thup kyrdan jong ka FIFA ba dang shu pyllait shen.
U Ryan Williams bad u Akash Mishra ki la pynkhihjar ha ka kylla step bad ha ka kylla miet, kaba la pynïoh ïa ka India ïa ka jingjop ba nyngkong ha kane ka lympung ïaknieh rung lane Qualifers. Ka dei ruh ka jingjop kaba nyngkong jong u coach u Khalid Jamil ha ka jingïalehkai kaba la long ha la ïing.
Wat hapdeng ka jingjop ïa ka Hong Kong- China, ka India kam shym la lah ban ïoh ïa ka jaka ha ka AFC Asian Cup 2027, ha kaba ka la duh noh ïa ka lad ban ïa shim bynta ha ka sien kaba nyngkong hadien 11 snem.
Ka India ka la pyndep ïa ka lympung ïaknieh rung (Qualifier) sha trai duh jong ka Group da kaba khur 5 poiñ naki hynriew sien ïalehkai, hadien ka Bangladesh (5), Hong Kong (8) bad ka Singapore (14).
Ka kyrdan kaba rit tam ba ka India ka la poi ha ka thup jong ka FIFA Rangking ka dei ka kyrdan ba 173 ba la hiar ha u bnai Lber jong u snem 2015
