Jowai, Risaw 24: Ka jingïalehkai mynta ka sngi hapdeng ka Banan Sport Club pyrshah ïa ka Tympang Sport Club haka 8th Inter-dong bala pyniaid da ka Seng Samla Khlachympa Sports and Cultural Club Nongtalang haka por 2 shiteng nohphai sngi kala kut haka jingïakhaid 0-0, wat la baroh Arliang ki kynhun kila pyrshang ban thaw ki lad ki lynti ban ïoh thep kol hynrei haduh bala kut ka por ym don ba ïoh ban thep kol.
Kumta ki hap ban ïasam mar shi point, na kane ka jingïoh shi point ka Banan SC kala kylla long ka kynhun kaba khatduh ban ïoh rung sha ka Semi-Final jong ka Inter-dong mynta u snem. Ka Tympang Sport Club watla ka long ka kynhun kaba khlaiñ bad bym shah rem tang shisien ruh, hynrei kala ïakhaid baroh lai ki jingïalehkai kala duh noh ban jam shaphrang namar kala ïoh tang lai point.
Ïa Ka Namtam (Man of the match) la ïoh da u Dexter Phawa jong ka Tympang SC.
Ki kynhun kiba la poi sha ka Semi-Final ka Nongtalang Mission Youth Club ka ban sa ïakhun pyrshah ïa ka New Nonglamin SC bad ka Banan SC ka ban sa ïakhun pyrshah ïa ka Amlariang SC.
