Shillong, Jylliew 30: Ka lympung ïalehkai ‘Hynniewtrep U-16 football league 2024’ kaba nyngkong ba la pynlong da ka Hynniewtrep Youths’ Council Central Body Sports Cell ka la jam mynta sha ka Semi Final, ha kaba ki saw kynhun kiba la ïohrung ki kynthup ïa ka PFR football Academy Shillong Center, Tanaw FC, Nangiaikiew FA bad ka Na Rympei FC.
Kumban shu pynkynmaw, ka jingpynlong jong ka HYC Central Body Sports Cell ïa kane ka lympung ka long shi bynta ban rakhe ïa u mawmer ka jingdap 10 snem jong ka kynhun naduh ba la seng ïa ka, ryngkat ka jingthmu ban plielad ïa ki khynnah ba dang khie samla kiba don ïa ka sap bad ban pyllait ïa ki na ki jingsniew kiba bun, khamtam u drok u ba la jyrsih bad pynsniewdur ïa ka ri Khasi.“Ha ka jingïakhun, ka PFR ka la pynliem ïa ka Pahamrioh FC lyngba ka Tie breaker da 6-5. Ka Tanaw ka pynliem ïa ka Lamjingshai da 3-0 kol. Nangta ka Nangiaikiew ka la jop lyngba ka tie breaker da 7-6 ban pynkhyllem noh ïa ka Umphyrnai. Khadduh ka Na Rympei FC ka la pynkhyllem noh ïa ka Little Kickers da 3-1 kol.
Nalor ki namjop, ka seng ka la ïoh ruh ban sam khusnam rangïalehkai ba kynsai lane ‘Player of the Match’ ha baroh ki jingïakhun quarter final, ha kaba na ka PFR la khur da u Kyrmenskhem Dkhar, na ka Tanaw FC lah ïoh da u Donboklang Jana, nangta na ka Nangiaikiew FA ka la leit sha u Bantei Mujai bad na ka Rympei la ïoh ban khur da u Scolin Syngkli.
Ka seng ka la pyntip ba ïa ka jingïakhun Semi Final yn pynlong lashai ka Sngi Balang (03 tarik Naitungs, 2024) ha kaba ka PFR football Academy Shillong kan aireng pyrshah ïa ka Tanaw FC ha ka por 12.30 mynsngi, bud sa ka jingïaknieh rung final hapdeng ka Nangiaikiew FA pyrshah ïa ka Rympei FC ha ka por 2 baje nohphai sngi.