Jowai, Risaw 26: Ka lympung ïalehkai phutbol bala tip kum ka ‘Hajan Shylla Memorial Trophy 1st Division’ bala pynïaid daka Thadlaskeiñ Sports Association (TSA) West Jaiñtia Hills ka la jam mynta sha ka wat ïakhun semi final hadien ba ladep pynthikna ïa baroh saw tylli ki kynhun kiba la jop ïa la ki jong ki jingïakhun ha ka Quarter Final ha madan Wahiajer Multi-Sports Complex.
Ka Larnai SC ka la long ka kynhun kaba khatduh napdeng ki saw tylli kiba la buh jaka ha ka semi final hadien ba ka la lah ban pynliem da 3-1 kol ïaka Dongmihsngi SC ha ka jingïakhun Quarter final kaba khatduh kaba la long ha ka sngi Saitjaiñ, 25 tarik Risaw 2025.
Ka jingïakhun ka la long kaba itynnat ha kaba ka Larnai SC ka la pynkhihjar nyngkong lyngba u Shaniah Nongrum (17’) ban lamkhmat ïa ka kylla step, shuwa ba ka Dongmihsngi SC kan pynïakhaid shi por lyngba u Dame Laloo (46’).
Hynrei tang hadien 2 minit ka Larnai SC ka la ïoh biang ban lamkhmat lyngba ka kol jong u Mebanrap Shadap (48), nangta ka pynskhem ïa ka jingjop lyngba u Iadonryngkat Kharshohnoh (65) uba la thep ïa ka kol kaba lai.
Kumta hadien ba la thikna lut ïa baroh ki kynhun ka jingïakhun ‘Semi Final’ ba nyngkong kan long haka 30 tarik u Risaw hapdeng ka Nongkhroh Mawsiang pyrshah ïaka Khliehtyrshi SC. Katba ka jingïakhun ‘Semi Final’ ba ar kan long haka 01 tarik u Naiwieng, 2025 hapdeng ka Ummulong SC pyrshah ïa ka Larnai SC.
