Shillong, Naiwieng, 10: U Vice Chancellor jong ka skulbah North-Eastern Hill University (NEHU) u Prof. PS Shukla u la jah rngai na la ing sah, la pyntip u Magistrate sha ki spah ngut ki samla pule kiba ïalum shabar ka ingsah jong u Shukla ha ka sngi u Blei.
Ïa ka jingjah rngai jong u Prof. Shukla la ïoh jingtip katba ki samla pule ki dang ïalum shabar ka iingsah jong u Vice Chancellor hadien ka jingïaid proseshon ba la pynlong da ka NEHU Research Scholars’ Forum (NEHURSF), ha kaba la ïashim bynta lang da ki samla pule, ki samla pule barim, ki Research Scholars bad ki nonghikai.
Ki samla pule kiba rah la ki plakad ha ka kti ki la pyrta shla da ka sur bajam, “”We need integrity in appointments” “NEHU’s future is at stake, step down VC” bad “No more convocation delays”, bad kiwei kiwei ki jingdawa.
Ki samla pule ki la shah pakhang lynti ha ki bor Pulit katba ki dang tur sha ka ingsah jong u Vice Chancellor bad dei ha kane ka khyllipmat ba ki la ïoh jingtip ba u Vice Chancellor u la jahrngai bad ym tip satia shaei u don tad haduh ba la thoh ïa kane ka khubor.
Ki samla pule ki la dawa ïa ki bor ba dei peit jong ka skulbah ban ujor da ka “missing person report’ sha ki bor Pulit.
Ka jingjah rngai jong u Vice Chancellor ka la jia hadien san sngi ba ki samla pule ki la pynlong ïa ka jingshah jingit ba khlem pud sngi kaba la sdang naduh ka noh sngi jong ka 5 tarik mynta u bnai.
