Nongstoiñ, Nailur 1: Uwei u samla ba la tip kyrteng kum u Phrangsngi Mawlieh 26 snem ka karta, na ka shnong Missei Porthyrnang kaba hap ha Mawshynrut Block, u la jah rngai na la ïing naduh ka arphew saw tarik u bnai Nailar bad um pat wan phai ïing haduh mynta.
U bah Bonifast Tyrsa u kpa jong utei u samla haba ïakren bad u nongthoh khubor mynta ka sngi, u la ïathuh ba hadien ba utei u khun jong u, u la jah na ïing ki la leit wad kylleng kylleng ryngkat ki paitbah shnong. Hynrei kim shym la lap satia kumta dei ha ka 26 tarik ki la leit ban pyntip sha ki pulit ha Riangdo Police Station.
U la ïathuh ruh ba ki pulit ka Riangdo ki la trei shitom bha ban wad jingtip, hynrei haduh mynta kim pat lap satia haei u don. Nalor kata u la ïathuh ruh ba ki la ïoh jingtip ba utei u khun jong u, u la poi ha Nongstoiñ bad ki don ki briew kiba la ïakynduh ïa u. Hynrei hadien katto katne por u la phet noh bad haba kiba haïing ki la wan poi ha Nongstoiñ, kitei ki briew ki la ong ba u la phet noh. Kumta ki la pyrshang ban wad ïa u kylleng kylleng, hynrei haduh mynta ka sngi kim pat lap satia. U bah Bonifast u la kyntu ïa kino kino kiba lap ne ïakynduh ïa u, kin sngewbha ban pyntip ha u da kaba phone ha une u number 9863375228.
