Jah rngai u nongbud trok uba bud ïa ka trok kaba ngam ha ka jingtwa ka surok ha Lumshnong

Khliehriat Jylliew 16: Uwei u nongbud trok uba la tip kyrteng kum u Bishujit Chakrabarty, 36 snem kyrta, u lah jah rngai hadien ba ka trok kaba u bud ka la ngam ha ka jingtwa ka surok ha Lumshnong, hajan ka Tool Gate Plaza, East Jaiñtia Hills District kaba la jia mynta ka sngi, ka jingtwa ka surok ka dei namar ka jingjur palat u slap kaba la neh la bun sngi.
Katkum ka jingiathuh u Superintendent of Police East Jaiñtia Hills District, u Jagpal Singh Dhanoa, IPS, la ong ba ha ka por ba ka trok ka ngam shapoh ha ka jingtwa ka surok national highway, u nong ñiah jong ka trok u la ïoh ban kynthih noh na ka trok katba utei u nongbud jong u pat ym shym la tip shuh shano u don “ Kat haduh ba ngim pat lap ïa utei u nongbud trok, ngim pat lah ban ong, la u la ngam jyllop ha ka um ne u don shano, ngim pat lah ban ong bad ngi shu ong ba utei u nongbud trok u dang jah rngai mynta” ong u Jagpal Singh.
La ong ruh ba utei uba bud trok, u dei na ka shnong Teliamura Santinagar, Khowai, West Tripura.