Nongstoiñ, Nailur 9: Kawei ka samla kynthei Garo kaba la tip kyrteng kum ka Pulanchi Momin kaba la 19 snem ka ka rta, kaba dei ka khun jong u Donjeng T.Sangma na ka shnong Nongchram Rongjeng West Khasi Hills District, ka la jah rngai na la ïing la katto katne sngi.
Kumta halor kane ka jingjah rngai jong ka khun kynthei, u kpa jong ka u la leit ban pan jingïarap na ki Pulit ka West Khasi Hills District bad u la kyrpad ruh ba kin ïarap lem ban pyntip ha baroh ki Thanat Pulit ka jylla bad kiwei kiwei.
Kane ka samla ka don ïa u shniuh ba lyngkot lam saw bthuh, ka rynïeng jong ka kaba jrong kumba 4 phut 8 inshi.
Ka dei na ka jaitbynriew Garo bad ka nang bha ban kren ïa ka ktien Hindi, Nepali, Manipuri bad Assamese.
La iohi khatduh shwa ba ka kan jah ba ka phong da ka patlun Jeans rong ïong, ka Blouse rong saw bad Sandal rong ïong.
