Tura, Jymmang 30 : Wat la u MDC ka BJP na Tura u Bernard Marak u la lap ïa ka jaka ba tei ïa ka Museum jongka Garo Hills Autonomous District Council (GHADC) lyngba ka RTI ba ka don ha ka North Tura Constituency ha ka shnong jong u MLA u Thomas Sangma, hynrei kaba pynlyngngoh pat ka long haba u leit wad ha katei pat ka jaka katei ka museum ka la jah rngai bad la mih pynban da kawei ka projek kaba dei ka Tribal Research Institutue (TRI).
“Baroh ar kine ki projek ki dei kiba la bei tyngka da ka sorkar pdeng bad ha ka jingshisha ia kane ka Museum la dei ban dep tei la kumno kumno ruh 80 % hynrei kaba lyngngoh ka la jah rngai pynban imat ka la shah btep shapoh khyndew namar la mih pynban da ka TRI ha katei ka jaka” ong u Bernard.
“ Haba ngi la leit wad bad haba ki trai shnong kila pyni ïa ngi ïa ka jaka ba la tei ïa ka Museum jongka GHADC kaba pynlyngngoh ka long ba kam don satia hynrei don pynban da ka ïing paki dulan jongka TRI” ong u Bernard.
Hato kane ka lah mo ban long ba baroh ar tylli ki projek ka sorkar pdeng yn pynpaw ba la dep tei haba kawei ka jah rngai bad paw tang ka TRI. Kat kum ka RTI ka jubab jongka GHADC ka long ba ïa kane ka Museum la pynkynriah na Sunny Hills Tura sha kawei pat ka jaka hynrei ha katei pat ka jaka ba dei ban tei ïa ka Museum jongka GHADC la tei da katei ka TRI. ïa ki engineer kiba donkti halor kane ka kam dei ban weng kam bad pynshitom kat kum ka aiñ ong u Bernard Marak.
“ Ngam tip shuh balei haduh katne kane ka sorkar ka leh ban ïoh bam klop ïa ka pisa na ki skhim ka sorkar pdeng ruh.Hato haduh katne la jia ruh ka sorkar kan dang kyntait beit ban aiti tohkit shaka CBI? Kumo ka GHADC kan ai ïa ka Utilisation Certificate halor ka jingtei ïa ka Museum haba katei ka museum ka la jahrngai na ka jaka ba la dei ban tei ïa ka. Kane ka pynpaw ba la jur palat ka jingïabam klop ba jahrngai katei ka projek” kynnoh u Bernard.
