Jah ka post Demonstrator Jr-1 haka eksam DSC, leit kynduh ka FKJGP ïa u DC Ri-Bhoi, kular ban shimkhia
Nongpoh, Rymphang 05: Ka Seng Federation of Khasi Jaintia & Garo People (FKJGP) Nongpoh Circle ka la pynpaw ïa ka jingsngewkhia kaba jur halor ka jingjah kynsan jong kawei ka post kam sorkar hapoh ka District Selection Committee (DSC) Ri-Bhoi District.
Katkum ka Advertisement lait kam ba la pynlait da ka ophis u Deputy Commissioner, Ri-Bhoi District, haka 31 tarik Naitung 2024, la pynmih shibun tylli ki post ban thoh exam DSC, kiba kynthup ruh ïa ka post Soil & Water Conservation Demonstrator Jr.-1, Level-4, kaba don haduh 4 tylli ki post ba lait.
Hynrei, haka Public Notice haka 17 tarik Nohprah 2025, kaba pyntip ïa ki tarik bad ki bynta ban thoh exam DSC bapher bapher, la lap ba ïa katei ka post Soil & Water Conservation Demonstrator Jr.-1, Level-4 ym shym la kynthup satia ha ka thup jong ki exam, kaba la pynlyngngoh bad pynsngewkhia shisha ïa ki paidbah.
Ïa kane ka jingjah jong katei ka post la lap da ki nongïalam ka FKJGP Nongpoh Circle, kiba la shimkhia mardor ban leit iakynduh ïa u Deputy Commissioner ka Ri-Bhoi District, u Abhilash Baranwal, uba long ruh kum u Chairman ka DSC Ri-Bhoi District, ban pynpaw hakhmat jong u ïa katei ka jingjah jong katei ka post.
Haba kren sha ki lad pathai khubor, u Samla Precious Khymdeit, President ka FKJGP Nongpoh Circle, ryngkat bad u Vice President George Weston Lyngdoh lem bad ki dkhot ka seng, ki la pynpaw ïa ka jingbym hun halor ka jingleh torti jong ka District Administration halor kane ka bynta.
U Samla Precious Khymdeit u la iathuh ba hadien ba la lap ïa ka jingjah jong katei ka post, ki la pan jingpynshai na u Deputy Commissioner, uba la ong ba kane ka lah ban jia na ka daw jong ka technical problem na NIC ha ka por ba pynmih ïa katei ka jingpynbna.
Shuh shuh u la iathuh ba u Deputy Commissioner u la kular ban shimkhia ïa kane ka kam, bad la pyntip ruh ba ïa ka exam jong ka post Soil & Water Conservation Demonstrator Jr.-1, Level-4 yn sa pynlong ha ka por ban sa wan, hadien ba la dep ban pynlong ïa ki exam jong kiwei pat ki post ba la dep pynmih.