Jah ka kyntien Khasi bad Garo mih da ka Marathi, Nepali bad Bengali

Nongpoh, Naitung 20 : Ka KSU, Northern Border Area mynta ka sngi kala ujor syndon da ka Ejahar ha Khanapara Police Station, pyrshah ïa u nongthoh bad kawei ka skul shimet ha Ri-Bhoi kaba la pyndonkam da kawei ka kot kaba ïalam bakla ïaka ktien ba kren haka jylla Meghalaya, kaba la ktah mationg ïaka jingsngew jong ki paidbah ka jylla bad lah ban ïalam bakla ïaki heprit bad kiwei pat ki jaidbynriew shabar ka jylla.
Katei ka dei ka kot Social Studies jong ka klass III kaba la thoh da u Dr. Dhananjay Joshi bad ka Neelam Jain bala pynmih da ka Bright Star Books International 521- Vasnat Kunj New Delhi-110070 bala pdiang da ka NCERT. La pynpaw lyngba katei ka kot ba ka ktien kaba ïakren haka jylla (Official Language) ka dei ka Bengali, Nepali bad Marathi haka jaka jong Khasi & Garo, bad ïa katei ka kot la pyndonkam da ka skul Little Star Senior Secondary School kaba don ka 9 mer Baridua ha Ri-Bhoi District kaba dei ka skul shimet.
Halor katei ka bynta naka liang ki nongïalam jong ka KSU hapoh ka jingïalam u Samla Alex Narleng President ka KSU Northern Border Area, samla John Paul Sohpdang Asst. Education Secretary ka KSU North Khasi Hills District bad kiwei kiwei kila leit ban ïakynduh syndon ïa u principal katei ka skul u BN Sharma naka bynta ban pan jingshai halor ka jingpyndonkam ïa katei ka kot kaba ïalam bakla, kaba la ïoh jingtip ruh ba kam dei kaba la pdiang da ka sorkar jylla.
Na ka liang utei u Principal u la pynpaw ba mar syn ïoh jingtip halor katei ka jingbakla katei ka kot, la pynsangeh noh syndon ban shim bad hikai ïa katei ka kot bad kular ruh ban thoh sha u nongpynmih katei ka kot ban pynbeit ïaki jingbakla namar ka ïalam bakla ïaki khynnah pule bad khamtam kiba shabar ka jylla Meghalaya.
Haba kren sha ki lad pathai khubor naka liang ki nongïalam ka seng KSU ki la pynpaw ka jingsngewkhia kaba jur halor katei ka kot kaba ïalam bakla bad ktah mat ïong ïaki paidbah haka jylla namar kumba la pynpaw ba ka ktien ba ïakren haka jylla ka dei ka ktien Bengali, Nepali bad Marathi nalor kiwei kiwei ki jingbakla kiba ka seng ka lap ha katei ka kot pule.
Kila ong ruh baka NCERT ka dei ban peit bñiah ha shuwa ban pdiang ïaki kot pule ban pynrung haki skul pule namar kane ka ïalam bakla ïaki khynnah pule khamtam kaba ktah ïaki paidbah ka jylla bad kyrpad ruh ïaka tnad pule ka jylla ban leh eiei halor u nongthoh jong katei ka kot.