Ka jingjop don burom jong ka Voice of the People Party (VPP) myn ha kane ka election Lok Sabha na ka Shillong Parliamentary Constituency ba dang shu dep ka la wanrah shisha ïa ka burom jong ka Jaidbynriew Khasi namar ym pat ju don koit ha ka history jong ka Meghalaya ba u nongjop un tam kput haduh 3,72,000 ei ei.
Kane ka jingjop jong u Dr Ricky Andrew Jones Synkon ka la pynduh thiah duh dem ïa kiwei pat ki party ba don ha ka liang synshar bad liang pyrshah khamtam ïa ka RDA (UDP & HSPDP) kaba ïoh vote tang 44,000 tam. Ban pynshisha ïa kane, la don ka jingkren ïamrem ruh na u heh ka NPP uba long ruh u MP Rajya Sabha Dr Wanweiroy Kharlukhi, hana ka jingjop kput jong ka VPP dei namar ka politics hunger strike jong u Bah Ardent Basaiawmoit President jong katei ka party ha ka snem 2023 halor ka Reservation Policy.
Ñiuma, lada ka dei kumta, kan bha shibun ba ki MLA bad MP jong ka NPP ruh kin shah thngan noh khnang ba kin jop election. Kine ki la long thik kum uto u myrsiang uba la shah shaiñtdong, nalor ka jinglehraiñ ka bym lah batai, haba u ïa kynduh ïa ki paralok myrsiang jong u, namar la saw kyrang, ha ka jaka ban ïathuh ïa ka jingshisha ba u la shah shaiñtdong ha ka por ba u leit tuh, u kyntu pynban ïa ki ruh ba kin shaiñ tdong lang namar ym don jingpyngngad kaba kat katta, u la ong. Te lada ka politics hunger strike ka treikam balei pat ha Garo Hills bym don kum kata ka programme ruh, ka kyrtong NPP ka kylla lyndang?.
Kawei kaba kham ima shuh shuh ïa ka lawei jong ki MLA ha Jaintia Hills ka long ba ka NPP & UDP ki la brut ha baroh hynñiew tylli ki Constituency. U Ma Sñiawbhalang Dhar Dy. CM u aidaw hana ba ka election MP ka pher na ka election MLA ba ki nongkyrshan jong u ki lah ban jied laitluid kat shaba ki mon namar ym dei ma u uba ïakhun. Lada ka long kumta, hato um tip ba ka ktem jong u ruh ka pra lang ?. Kaba sngewtynnad ha kane ka kynti ka long, ba ki paidbah ka Jaiñtia ki pynshisha ba lada khlem pynbam peisa ruh, ki lah ban jop election.
Kumba la dep ban thoh ha ka issue ba la dep don bun ki daw ba ki paidbah ki la ngiah shoiñ ïa ka sorkar MDA ba lamkhmat da ka party NPP. Phim lah ban pynshad shrieh ïa u paidbah katba phi mon, namar ki ïohi ba ka Jylla hapoh ka jingsynshar jong kane ka sorkar MDA, ka roi ka par bad ka ïoh ka kot ka la nianghiar arsut, ka Jylla ka jam shikam shakhmat bad arkam shadien.
Kum kawei na ka jingpynpaw ba ïamrem jong kane ka sorkar MDA ka long, ba ïa ka jaka ba kham kylluid ba ki birew ki shahthngan hajan Additional Secretariat, tang khyndiat sngi hadien ba la dep shahthngan sa i Kong Bindas Syiem na thaiñ Umden Diwon, ka sorkar wut wut ka la hukum ban ker noh ïa katei ka jaka khnang ban khanglad ïa kiwei pat ki briew nangne shakhmat.
Te lada phi ong ba dei namar ba ka pynwit ïa ka ïaid ka ïeng jong ki paidbah ka lah ban dei hynrei kumba paw hi ka long, ba ka dei ka jingbishni ba kiba shangthngan hangtei ki ïoh ïa ka popularity ne ka jingpawnam ha ki paidbah. Hynrei lada ngi ïakren pat ïa ka Hok ban ïa khih te phim lah ban khang namar ka Freedom of Speech and Expression, Right to protest peacefully la shon shap ha ka Constitution jong ka ri India.
Lada ka sorkar ka sngewkamram shisha ïa ka synshar paidbah, kam dei ban shu ker sainar ne tei kynroh ïa ka jaka ïakhih da kaba jaijai hynrei ka dei ban shna pat da ki kynja Jantar Mantar kum sha Delhi, Jaipur bad shawei ba ki paidbah kin ïoh ban protest da kaba jaijai khlem pynwit ïa ka shongsuk shongsaiñ.
To ngin phai sha ka jingkiew jong ka VPP lyngba ka symbol jong u Prah, don kiba ong dei namar ba bang than eh ka sur ban kyndiah kaba pynkhih mynsiem ïa ki briew, to lada ka long kumta ruh, ka burom ka leit sha i Bah S.F. Mylliemngap nongthaw jingrwai bad u Skhemborlang Myrboh, nongrwai na Mawlynrei. Hynrei ryngkat bad ka sur u Prah ka nongrim jong katei ka party ban pynkhuid ïa ka bamsap bamphong (clean politics campaign),ka khring ïa ki paidbah namar ki kyrmen ba dei satang kane ka lawei jong ki khun ki kti jong ki, khamtam hadien ba ki la mad ïa ki party rilum kum ka UDP bad HSPDP kiba ïasnoh Bus lang bad ka NPP. Ki paidbah ki la ngiah shoiñ.
Hynrei kumno pat ba ka VPP kan pynneh ïa kane ka lyer kyrshan Prah jong ki paidbah, kata ka dei ka jingkylli kaba eh ban shu jubab muk mak. Ki Paidbah ki la ai ïa ka jingkyrshan (mandate), mynta pat ki peit kliaw kumno ki heh jong katei ka party ki ïaid. Kawei na ki jingsdang myn ha kane ka taiew ba la dep ka long ha ka jingïajied Speaker Lok Sabha.
Hooid la ïohi ba ki don ki national news channel kiba pynphriang khubor ba u MP ka VPP u kyrshan ïa u kyrtong Speaker ka NDA 3.0 hynrei ngi ïohi ruh ba ki heh ka VPP ki la kyntait mardor ïa katei ka khubor hamsaïa ba ka long ka bym shisha. Don bun ki briew wat na ki nongkyrshan ruh ki bym sngewtynnad ba ka VPP kan ong ba nym kyrshan ïano ïano ruh, la ka India Block ne na ka NDA. Ha Parliament kam lah ban long kumta, mutdur kan jia aiu lada u speaker un declare ‘Unattached member’ ïa u MP u bym don liang. Katei ka jingleh ka long pynban kumba ai kuli Tup ïa ka liang pyrshah hangne ban pynbthei pyrshah ïa ka VPP. Ngi ïohi ruh ha ki Discovery Channel lada u Muid (Buffalo) uba ïaid mon marwei khlem kynhun ynda la ïa kynduh ïa ki sing ki jop bad ki bam da kaba suk.
Don kiba kynnoh ba u nongïalam katei ka party u don ka jingmlien wat ha ka Jylla ruh ban nym jied speaker, dei na kata ka daw ba u MP ruh u leh kumjuh. Ha ka jingshisha, lada phi kyrshan ne ym kyrshan ruh shu sngap beit ym don ba tip khamtam da ka Voice Vote ym da kaba rah kti ne secret ballot. Hynrei ka jingbakla hangne ka long ba shwa ban jied Speaker ka VPP la ka dep pynbna paidbah lypa ba kin nym kyrshan ïano ïano ruh. Ki issue Jaidbynriew kin nym poi shano shano hapdeng ki 542 + ngut ki MP lymda phi kyrshan sha kawei na ki ar mamla, namar ym lah te ban thaw pyrthei marwei.
Ïa kane ka jingbakla ym dei ban pynksan hynrei dei ban pdiang bad maramot namar ym tang ka jong nga lane kaba leh manga kaba dei suda, sngap lang ïa ka Sur u Paidbah namar ka lynti ïaid jong ka VPP ka dangjngai palat haba ka dangdap tang laisnem tam ka rta. U Paidbah u la theh lut; kum kine ki mat dei ban ïaphylliew jingmut bad ban ïasyllok bad ki riewrangbah da ka jingkhang kaba plie wang ym da kaba la buh kyndon lypa.
Namar kane ka synshar paidbah ruh ka long kum kata ka ‘Chunong jong ki Pnar’ kaba mut haba phi kwah ba ki paralok kin wan ïarap ban ïathung ïabet lang sha pynthorkba jongphi, phi ruh hap ban leit ïarap lang sha lyngkha jong ki. Ngim tip sa katno tylli ki mat jong ka Jaidbynriew kiba dangdei ban pynsngew ha Parliament te ngim tip lada ngi khim jingmut te ka long kaba eh palat.Uwei u riewkhraw u ong “ka politics ka dei ka jingstad ban pynmih jingeh, wad ïa kata kylleng kylleng, pharia ïa ka da kaba bakla bad kyllan dawai da ka bymdei”. (Politics is the art of looking for trouble, finding it everywhere, diagnosing it incorrectly and applying the wrong remedies). Te ki paidbah kim kwah ba ka VPP kaba la ïoh jingshaniah katne ba kan long kumta.
